कोशी प्रदेश प्रहरी प्रमुख कार्कीद्धारा जिल्ला प्रहरी कार्यालय सोलुखुम्बुको निरीक्षण

कार्तिक २५, सोलुखुम्बु । कोशी प्रदेश प्रहरी प्रमुख प्रहरी नायव महानिरीक्षक ईश्वर कार्कीले जिल्ला प्रहरी कार्यालय सोलुखुम्बुको निरीक्षण भ्रमण गर्नुभएको छ । निरीक्षणका क्रममा उहाँले कार्यालयका सम्पूर्ण शाखा, प्रशासनिक कार्यहरू तथा हिरासत कक्षको स्थलगत अवलोकन गर्दै त्यहाँ कार्यरत प्रहरी कर्मचारीहरूलाई आवश्यक निर्देशन दिनुभयो ।

निर्देशनको क्रममा प्रमुख कार्कीले सोलुखुम्बु जिल्ला भौगोलिक दृष्टिले विकट भए पनि पर्यटकीय सम्भावनाले भरिपूर्ण क्षेत्र भएकोले यहाँका प्रहरी कर्मचारीहरूले विशेष सतर्कता र जिम्मेवारीका साथ सुरक्षा व्यवस्थामा ध्यान दिनुपर्ने बताउनुभयो । उहाँले समाजमा शान्ति सुरक्षा कायम राख्न छोटो तथा लामो दुरीका गस्ती परिचालन गर्न, अपराधजन्य घटनाहरूलाई निरुत्साहित गर्न तथा असहाय, गरिब, पिडित र ज्येष्ठ नागरिकका समस्या प्राथमिकताका साथ समाधान गर्न प्रहरी सेवामा समर्पित हुन निर्देशन दिनुभयो ।

त्यस अवसरमा उहाँले प्रहरी कर्मचारीहरूलाई हरेक परिस्थितिमा उच्च मनोबलका साथ इमान्दारीपूर्वक काम गर्न, आफ्नो पदीय जिम्मेवारी र आदेश–निर्देशनलाई अक्षरशः पालना गर्न तथा अपराध नियन्त्रण र अनुसन्धानमार्फत संगठनको छवि उच्च राख्न प्रेरित गर्नुभयो ।

निरीक्षण भ्रमणको क्रममा कोशी प्रदेश प्रहरी प्रमुख कार्कीलाई जिल्ला प्रहरी कार्यालय सोलुखुम्बुका कार्यालय प्रमुख प्रहरी नायव उपरीक्षक मनोजित कुँवरले जिल्लाको समग्र शान्ति सुरक्षाको वर्तमान अवस्थाबारे विस्तृत प्रस्तुतिकरण समेत गर्नुभएको थियो ।