थुलुङ दुधकोशीमा चार दिने निःशुल्क स्वास्थ्य शिविर सम्पन्न, साढे १८ सय नागरिक लाभान्वित

कार्तिक २५, सोलुखुम्बु । सोलुखुम्बुको थुलुङ दुधकोशी गाउँपालिकामा चार दिने बृहत् निःशुल्क स्वास्थ्य शिविर सम्पन्न भएको छ । गाउँपालिकाको समन्वयमा तथा कादुरी एग्रिकल्चरल एड एशोसिएसनको आयोजनामा सञ्चालन गरिएको शिविर मंगलबार सकिएको हो । शिविर गाउँपालिकाको मुक्लास्थित विरेन्द्रोदय माध्यमिक विद्यालयमा सञ्चालन गरिएको थियो ।

कादुरी एग्रिकल्चरल एड एशोसिएसन, ब्रिटिस गोर्खाज नेपालका क्याप्टेन राजन राईका अनुसार चार दिनसम्म चलेको शिविरबाट १ हजार ८ सय ५० जना सेवाग्राही लाभान्वित भएका छन् । थुलुङ दुधकोशी गाउँपालिकाका बासिन्दा मात्र नभई सोताङ गाउँपालिका, सोलुदुधकुण्ड नगरपालिका, नेचासल्यान गाउँपालिका र माप्य दुधकोशी गाउँपालिकाका नागरिकहरूले समेत शिविरबाट सेवा लिएका थिए ।

शिविरमा स्त्रीरोग सम्बन्धी जाँच तथा उपचार, आँखा परीक्षण र मोतिबिन्दु शल्यक्रिया, दाँत उपचार तथा झिक्ने सेवा, साथै रगत, पिसाब, मुटुको ईसीजी, भिडियो एक्स–रे लगायतका स्वास्थ्य परीक्षणहरू निःशुल्क रूपमा गरिएका थिए । उपचारपछि आवश्यक औषधिहरू समेत निःशुल्क वितरण गरिएको थियो ।

शिविरमा विभिन्न नेपाली विशेषज्ञ चिकित्सकहरूको टोली खटिएको थियो । गाउँमै विशेषज्ञ सेवा प्राप्त गर्न पाउँदा स्थानीयवासीहरू अत्यन्तै खुशी देखिएका छन् । स्वास्थ्य सेवा लिनका लागि जिल्लाबाहिर हजारौँ रुपैयाँ खर्च गर्नुपर्ने बाध्यता अन्त्य भएको भन्दै सेवाग्राहीहरूले गाउँपालिका र आयोजक संस्थाप्रति आभार व्यक्त गरेका छन् ।