महाकुलुङ १ पात्लेमा आधारभूत स्वास्थ्य इकाई स्थापना

संवाददाता उद्धव कुलुङ, सोलुखुम्बु । सोलुखुम्बुको महाकुलुङ गाउँपालिका–१ पात्लेमा आधारभूत स्वास्थ्य इकाई स्थापना गरिएको छ । वडाको वार्षिक स्वीकृत कार्यक्रम (आ.व. २०८२/०८३) तथा महाकुलुङ गाउँपालिकाको सहयोगमा आधारभूत स्वास्थ्य इकाई स्थापना गरिएको हो ।

स्वास्थ्य सेवामा सहज पहुँच सुनिश्चित गर्ने उद्देश्यका साथ सुरु गरिएको यस स्वास्थ्य इकाईका कारण अब पात्ले छेउलाका बासिन्दालाई सामान्य स्वास्थ्य समस्या हुँदा सोताङ वा महाकुलुङ प्राथमिक अस्पतालसम्म धाउनुपर्ने बाध्यता अन्त्य भएको छ । पात्ले क्षेत्रमा हाल जम्मा ८५ घरधुरी र ४३९ जनसंख्या रहेका छन् । स्थानीय स्तरमै स्वास्थ्य सेवा प्राप्त गर्न पाउने भएका कारण गाउँले अत्यन्त हर्षित भएका छन् । निः शुल्क रूपमा घर उपलब्ध गराइदिनुभएका प्रेम बस्नेत प्रति वडाले आभार प्रकट गरेको छ ।

वडा कार्यालयले १ वर्षभित्र आफ्नै भवन निर्माण गरी नियमित सेवा सञ्चालन गर्ने लक्ष्य लिएको बताएको छ । यसका लागि वडाध्यक्ष पर्खी धन राई ले निशुल्क जग्गा व्यवस्थापनमा सहयोग गर्न सम्पूर्ण स्थानीयवासीहरूलाई हार्दिक अनुरोध गर्नुभएको छ । कार्यक्रमको उद्घाटन वडाध्यक्ष राईको प्रमुख आतिथ्य तथा गाउँपालिकाका प्रमुख प्रशासकीय अधिकृत छोइसाङ तामाङको प्रमुख आतिथ्यमा सम्पन्न भएको जनाइएको छ ।