लिखुपिके गाउँपालिकामा शैक्षिक गुणस्तर सुधारका लागि अन्तरक्रिया तथा छलफल

कार्तिक ३०, सोलुखुम्बु । सोलुखुम्बुको लिखुपिके गाउँपालिकामा शैक्षिक गुणस्तर वृद्धिसँग सम्बन्धित महत्त्वपूर्ण अन्तरक्रिया तथा छलफल कार्यक्रम सम्पन्न भएको छ । गाउँपालिकाको आयोजनामा शनिबार गरिएको उक्त कार्यक्रममा गाउँभित्रका २२ वटै विद्यालयका विद्यालय व्यवस्थापन समितिका अध्यक्ष र प्रधानाध्यापकहरू सहित स्थानीय जनप्रतिनिधि तथा कर्मचारीहरूको सक्रिय सहभागिता रहेको थियो ।

कार्यक्रममा गाउँपालिका अध्यक्ष मिना कार्की बस्नेत, उपाध्यक्ष ङ्वाङ लाक्पा शेर्पा, प्रमुख प्रशासकीय अधिकृत अग्नि प्रसाद पराजुली, वडा अध्यक्षहरू, कार्यपालिका सदस्यहरू तथा सम्बन्धित शाखाका कर्मचारीहरूले सहभागीहरूलाई सम्बोधन गर्दै विद्यालयस्तरको शैक्षिक गुणस्तरमा देखिएका कमजोरी, दरबन्दी मिलान, समग्र शैक्षिक गतिविधि र विद्यालयहरूमा देखिएका चुनौतीबारे खुलस्त छलफल गरेका थिए ।

अध्यक्ष बस्नेतले गाउँपालिकाले शिक्षालाई प्राथमिकतामा राख्दै विद्यालयहरूको शैक्षिक अवस्था सुधार गर्न आवश्यक नीति–कार्यक्रम अघि सारिएको बताउनुभयो ।उपाध्यक्ष शेर्पाले शिक्षामा देखिएका व्यावहारिक चुनौती समाधान गर्न विद्यालय, अभिभावक र स्थानीय सरकारबीच समन्वय अझ सुदृढ हुनुपर्नेमा जोड दिनुभयो ।

प्रमुख प्रशासकीय अधिकृत पराजुलीले विद्यालयहरूमा दरबन्दी सम्बन्धी जटिलता, कानुनी प्रावधान र कार्यान्वयन प्रक्रियाका मुद्दामा प्रस्ट जानकारी गराउँदै शिक्षा शाखाले गर्ने पहलबारे जानकारी दिनुभयो ।

छलफलबाट विद्यालयहरूमा देखिएका समस्याहरू, स्थानीय स्तरमा समाधान गर्न सकिने पक्षहरू तथा कानुनी जटिलता समाधानका लागि आवश्यक मार्गचित्र निर्माण गर्ने सहमति बनेको शिक्षा शाखाले जनाएको छ ।

सहभागीलगायत जनप्रतिनिधिहरूले विद्यालय संहिता कार्यान्वयन, शिक्षक–विद्यार्थी अनुपात सन्तुलन, शैक्षिक स्रोतसाधन व्यवस्थापन र सिकाइ प्रभावकारितामा सुधारका उपायबारे सुझाव दिएका थिए । शैक्षिक सुधारलाई दीर्घकालीन र परिणाममुखी बनाउन यो प्रकारका छलफल नियमित रूपमा गरिने गाउँपालिकाले जनाएको छ ।