खुम्बु पासाङल्हामुले बाइक तथा गाडी मर्मत सम्बन्धी तालिम दिँदै 

मंसिर ८, सोलुखुम्बु । सोलुखुम्बुको खुम्बु पासाङल्हामु गाउँपालिकाले गाउँपालिकाका नागरिकलाई मोटरसाइकल, गाडी तथा हेब्बी सवारी साधन मर्मत गर्ने तालीम दिने भएको छ । गाउँपालिकाले एक सूचना जारी गर्दै गाउँपालिकाका नागरिकलाई तालिममा सहभागी हुन आह्वान गरेको छ । पालिकाबासीलाई सीपयुक्त बनाउने अभियान स्वरुप गाउँपालिकाको आयोजनामा तालिमको आयोजना गर्न लागिएको गाउँपालिकाका प्रमुख प्रशासकीय अधिकृत नवराज गौतमले जानकारी दिनुभयो । जारी सूचनामा तालिम लिन चाहानेहरुलाई सम्पर्कमा आउन भनिएको छ । आवेदन दिने आवेदकहरूले गाउँपालिकाले तोकेका मापदण्डहरू जस्तै गाउँपालिकाकै नागरिक हुनुपर्ने, कम्तीमा ८ कक्षा पास गरेको हुन पर्ने र १८ वर्ष पुरा भई ४० वर्ष ननाघेको हुन पर्ने बताइएको छ ।  तालिममा सहभागी हुनका लागी पालिकाबासीहरुले नागरिकताको प्रतिलिपि, शैक्षिक योग्यताको प्रतिलिपी, वडा कार्यालयको सिफारिस पत्र र निवेदन बुझाउनुपर्ने छ ।