सोताङले गर्यो विद्यार्थीको सुरक्षा सुनिश्चित गर्न चारपांग्रे सवारी आवागमनमा प्रतिबन्ध

मंसिर १०, सोलुखुम्बु । सोलुखुम्बुको सोताङ गाउँपालिकाले विद्यालय आउने–जाने विद्यार्थीको सुरक्षा र सुविधा सुनिश्चित गर्न केही निश्चित समयमा चारपांग्रे सवारी साधन संचालनमा रोक लगाउने निर्णय गरेको छ । गाउँपालिकाको कार्यपालिकाको कार्तिक ३० गतेको निर्णय र अभिभावकबाट बढ्दो जनगुनासोलाई मध्यनजर गर्दै यस्तो व्यवस्था गरिएको हो ।

गाउँपालिकाले बुधबार सूचना जारी गर्दै दैनिक विहान ९ बजेदेखि १० बजेसम्म र अपराह्न ४ बजेदेखि ५ बजेसम्म सोताङ गाउँपालिकाको भक्तबहादुर दाहालको घरको ठाडो बाटो हुँदै डाँडागाउँसम्म तथा फुस्तेलचोकदेखि बजार कम्पाउण्डसम्मको मार्गमा कुनै पनि चारपांग्रे सवारी साधन संचालन गर्न नपाइने स्पष्ट गरेको छ ।

निर्धारित समयमा विद्यार्थीहरूको आवतजावत अत्यधिक हुने भएकाले उनीहरूको सुरक्षामा जोखिम बढेको भन्दै सवारी निषेध आवश्यक भएको गाउँपालिकाले बताएको छ । यस अवधिमा प्रतिबन्धको उल्लङ्घन गरिएमा प्रचलित कानुन अनुसार आवश्यक कारबाही गरिने चेतावनी दिँदै निमिक्त प्रमुख प्रशासनिक अधिकृत श्रीध्वज राईले अभिभावक र सर्वसाधारणको सहयोगका लागि आग्रह समेत गर्नुभएको छ ।