डिपिआर सच्याएर सुरु भयो हलेसीको नगर अस्पताल निर्माण

मंसिर १२, सोलुखुम्बु ।
दिपेन्द्र खनाल – खोटाङको हलेसी तुवाचुङ नगरपालिकाको नगर अस्पताल निर्माण सुरु भएको छ ।  डिपिआर डिजाइनमा भएको गडबडीका कारण लामो समय देखी रोकिएको नगर अस्पताल निर्माणको कार्य समस्या समाधान गरेपछि फेरी सुरु भएको हो ।  तत्कालीन प्रधानमन्त्री केपी शर्मा ओलीको सरकारले २०७७ साल मङ्सिरमा एकैपटक ३ सय ९६ वटा नगर तथा पालिका अस्पतालको शिलान्यास गरेको थियो ।  

        हलेसी तुवाचुङ नगरपालिकाको नगर अस्पताल समेत सोही समयमा शिलान्यास भई २०७८ मा काम सुरु भएकोमा डिपिआर डिजाइनमा भएको गडबडीका कारण काम केही प्रतिशतमै रोकिएको थियो । तर हालको नगरपालिका सरकारले लिएको पहलकदमी पछि नगर अस्पताल निर्माणको काम गत एक हप्ता यता निरन्तर भइरहेको नगरपालिकाका प्रवक्ता तथा वडा नम्बर ७ का अध्यक्ष कमल गिरीले बताउनुभयो ।  नमुना हिमालयन जेभिले २०८० साल साउन ७ गते सक्ने गरी २०७८ साल साउन ७ गते सम्झौता गरिएको थियो ।  डिपिआर डिजाइनमा भएको उलटपुलट कारण काम रोकिएपछि नगरपालिकाका मेयर विमला राईले स्वास्थ्य तथा जनसङ्ख्या मन्त्रालय सहित सम्बन्धित सरोकार वाला निकायसँगको पहलकदमी पछि डिपिआर सच्याएर काम सुरु हुन सफल भएको प्रवक्ता गिरीले बताउनुभयो ।

        अहिले सोही निर्माण कम्पनी नमुना हिमालय जेभीसँगकै सम्झौतालाई निरन्तरता दिँदै नगर कार्यपालिकाको गत असार २९ गतेको बैठकले २०८३ साउन ७ गते सम्म काम सक्ने गरी सम्झौता थपेको छ ।  सङ्घीय सरकारको भ्याट बाहेक ११ करोड ९९ लाख १९ हजार ६ सय २९ रुपैयाँमा काम सक्ने गरि अस्पताल निर्माण प्रारम्भ भएको जनाइएको छ । नगर अस्पताल १५ शैय्याको क्षमतामा अपाङ्ग मैत्री, आधुनिक र बालमैत्री निर्माण गरिने छ । पुर्वको पशुपतिनाथ भनेर चिनिने हलेसी महादेवको मन्दिर समेत भएको नगरपालिकाले हाल यहाँको विकास र समृद्धिमा उल्लेख्य काम गरिरहेको छ ।  अस्पताल निर्माणमा भएको समस्या समाधान गर्नका लागी विभिन्न तहबाट गरिएका प्रयासहरूले सार्थकता पाएपछि अव यहाँका नागरिकले प्रभावकारी स्वास्थ्य सेवा पाउन सदरमुकाम वा काठमाण्डौ धाउनुपर्ने दिनहरूको अन्त्य हुन धेरै टाढा नरहेको मेयर विमला राईले बताउनुभयो ।