हिमाल दर्शन विद्यार्थी सहायता कोषको दोस्रो स्थापना दिवस मनाइयो

मंसिर १३, सोलुखुम्बु । सोलुखुम्बुको नेचासल्यान गाउँपालिका स्थित हिमाल दर्शन माविमा विद्यार्थी सहायता कोषको दोस्रो स्थापना दिवस मनाइएको छ । ‘जन्मदिनमा मेरो लगानी, कल्याणकारी कार्यको थालनी’ भन्ने मूल नाराका साथ शुक्रबार हिमाल दर्शन विद्यार्थी सहायता कोषको दोस्रो स्थापना दिवस भव्य रुपमा मनाइएको हो ।

कार्यक्रम विद्यालय व्यवस्थापन समिति अध्यक्ष ओम प्रसाद बस्तोलाको अध्यक्षता तथा नेचाचासल्यान गाउँपालिका अध्यक्ष धनजन राईको प्रमुख आतिथ्यमा सम्पन्न गरिएको थियो । स्थापना दिवसको अवसरमा सहायता कोषको आय–व्यय विवरण समितिका सदस्य नवराज जमरकटेलले प्रस्तुत गर्नुभएको थियो ।

उहाँका अनुसार २०७८ साल असोज २ गतेदेखि २०८२ भाद्र ३० गतेसम्म कोषमा आय २२ लाख ३५ हजार ६८ रुपैयाँ रहेको छ भने व्यय १ लाख २३ हजार ८ सय ५३ रुपैयाँ खर्च भएको छ। साथै मुद्दती खातामा २० लाख ५० हजार रुपैयाँ जम्मा रहेको जानकारी गराइएको छ । विद्यालयमा अध्ययनरत गरिब तथा जेहेन्दार ४३ जना विद्यार्थीलाई ड्रेस, स्कुल ब्याग र स्टेशनरी कोषबाट आएको ब्याज रकममार्फत वितरण गरिएको विद्यालय व्यवस्थापन समिति अध्यक्ष बस्तोलाले बताउनुभयो ।

त्यसैगरी, २०८१ सालका उत्कृष्ट विद्यार्थी बजारबाट कक्षा १० की बिनिता कटेल (जिपिए ३.७८) तथा कक्षा १२ का मनिलबाबु काटेल (जिपिए ३.४६) लाई नगद १–१ हजार रुपैयाँ तथा प्रशंसा पत्र प्रदान गरिएको थियो । साथै सहायता कोषमा १० हजार रुपैयाँभन्दा बढी रकम जम्मा गर्ने अभिभावकहरूलाई पनि सम्मानपत्र प्रदान गरिएको छ ।

उक्त कार्यक्रममा कार्यपालिका सदस्य, अक्षयकोष दाता, चन्दा दाता, विद्यालय व्यवस्थापन समितिका पदाधिकारी, सीएसएस अध्यक्ष सहित अभिभावक, शिक्षक तथा विद्यार्थीको उल्लेख्य उपस्थिति थियो। कार्यक्रम भव्य र सफलतापूर्वक सम्पन्न भएको सहकर्मी सोभित ढुंगेलले जानकारी दिनुभयो ।