सोलुखुम्बुमा माओवादी केन्द्र र समाजवादीको संयुक्त एकता भेलाको तयारी तिव्र

मंसिर २६, सोलुखुम्बु । नेपाल कम्युनिष्ट पार्टी (माओवादी केन्द्र) जिल्ला समन्वय समिति सोलुखुम्बुले जिल्लाभित्र एकता प्रक्रियालाई सुदृढ बनाउन मंसिर २३ गते बसेको संयुक्त अनलाइन बैठकको निर्णय सार्वजनिक गर्दै एकता भेलामा अनिवार्य रूपमा सहभागी हुन सम्बन्धित पार्टी संरचनालाई आह्वान गरेको छ ।

नेकपा (माओवादी केन्द्र) र नेकपा समाजवादी, सोलुखुम्बुका पदाधिकारी तथा उपलब्ध केन्द्रीय सदस्यहरूको उपस्थितिमा बसेको संयुक्त अनलाइन बैठकले पौष १ गते आयोजना हुने एकता भेला सम्पन्न गर्न सबै तह–तप्काका नेताकर्मीहरुको अनिवार्य उपस्थिति आवश्यक रहेको जनाएको हो ।

जिल्लाबाट प्रतिनिधित्व गर्ने केन्द्रीय आयोजक समितिका सदस्य, केन्द्रीय सल्लाहकार, केन्द्रीय आयोग तथा निकायका सदस्य, प्रदेश कमिटी सदस्य, प्रदेश सल्लाहकार, जिल्ला समन्वय समिति सदस्य, नगर तथा पालिका कमिटीका पदाधिकारी तथा सदस्यहरूलाई एकता भेलामा उपस्थित हुन आग्रह गरिएको छ । कार्यक्रम जिमी राई उत्थान समाज, स्थानीय समितिको सभाहलमा हुने जनाएको छ ।

एकता भेलाबारे जानकारी दिँदै नेपाल कम्युनिष्ट पार्टी (माओवादी केन्द्र) जिल्ला समन्वय समिति सोलुखुम्बुका संयोजक नाम्गेल शेर्पाले पार्टी एकताको निम्ति सबै जिम्मेवार नेतृत्व तथा कार्यकर्ता सक्रिय रूपमा उपस्थित रहन अनुरोध गर्नुभएको छ ।