रसुवा मावि भुट्टारका कार्यालय सहयोगी बुढाथोकीलाई नगद ३ लाख ६३ हजारसहित सम्मानपूर्वक बिदाइ

पौष ३, सोलुखुम्बु । उदयपुरको रौतामाई गाउँपालिका–२ मा अवस्थित रसुवा माध्यमिक विद्यालय, भुट्टारले करिब ४३/४४ वर्षदेखि विद्यालयमा निरन्तर सेवा गर्दै आएका कार्यालय सहयोगी गोविन्द बुढाथोकीलाई सम्मानपूर्वक बिदाइ गरेको छ । लामो समयसम्म इमानदारी, कर्तव्यनिष्ठा, मेहनत र सेवाभावका साथ विद्यालयको उन्नतिमा योगदान पु¥याएको कदर गर्दै विद्यालयको तर्फबाट नगद रु. १,५१,१११ र शिक्षक–कर्मचारी, विद्यार्थी, पूर्वविद्यार्थी तथा पूर्वशिक्षकहरूको सहभागितामा संकलित रु. २,१२,४५७ गरी जम्मा रु. ३,६३,५६८ रकम चेकमार्फत हस्तान्तरण गरिएको हो ।

यस सहयोग अभियानको थालनी शिक्षक घनरमण (सविन) दाहालले गर्नुभएको थियो भने अभियानलाई अझ प्रभावकारी र अर्थपूर्ण बनाउन स्थानीय समाजसेवी गोपाल दाहालको महत्वपूर्ण भूमिका रहेको विद्यालयले जनाएको छ । सेवा निवृत्तिका अवसरमा आयोजित “बिदाइ तथा फेरि भेटौँला” शीर्षकको बृहत् कार्यक्रममा विद्यालय परिवार, स्थानीय अभिभावक, समाजसेवी तथा शुभेच्छुकहरूको उल्लेख्य उपस्थिति रहेको थियो । कार्यक्रमबारे जानकारी दिँदै रौतामाई भुट्टारका लोकबहादुर विश्वकर्माले विद्यालयले कर्मचारीप्रतिको सम्मान र जिम्मेवारीको उत्कृष्ट उदाहरण प्रस्तुत गरेको बताउनुभयो ।