पौष ८, सोलुखुम्बु । सोलुखुम्बुको दोर्पु बजार नजिकै बस्दै आएकी दोमी शेर्पाको दैनिकी अरूभन्दा फरक छैन । बिहानै उठेर खेतबारीमा पसिना बगाउने, सागसब्जी उत्पादन गर्ने र शनिबार लाग्ने नयाँ बजारको हाटमा पुगेर आफ्ना उत्पादन बेच्ने—यही नै उनको जीवनको नियमित क्रम हो । तर यही साधारण देखिने जीवनभित्र असाधारण संघर्ष र मेहनत लुकेको छ ।
एक छोरा र दुई छोरीकी आमा दोमी शेर्पाले आफ्ना सन्तानलाई यही सागसब्जीको व्यापारबाट हुर्काइन्, बढाइन् र पढाइन् । आर्थिक अभाव, ग्रामीण जीवनका चुनौती र श्रमको कठोरताबीच पनि उनले कहिल्यै हार मानिनन्। खेतिपातीलाई नै आधार बनाएर परिवारको जीविकोपार्जन गर्दै आएकी उनको संघर्षको कथा सुन्दा जो–कोहीको आँखामा आँसु आउन सक्छ ।
उनै मेहनती महिला किसान दोमी शेर्पालाई आज नेपाल विकासका लागि ज्ञानेश्वर फाउन्डेशनले सम्मान गरेको छ। फाउन्डेशनले ‘ज्ञानेश्वरी कृषि उद्यमशीलता सम्मान’ घोषणा गर्दै शेर्पालाई नगद १ लाख २० हजार रुपैयाँसहित प्रमाणपत्र प्रदान गरी सम्मान गरेको हो । सम्मान कार्यक्रममा फाउन्डेशनका अध्यक्ष ज्ञानेश्वर भट्टराईले कृषि उद्यममार्फत आत्मनिर्भर जीवन बिताइरहेका किसानहरूको मेहनतको कदर गर्नु नै फाउन्डेशनको उद्देश्य रहेको बताउनुभयो। उहाँले आफ्नै व्यक्तिगत लगानीमा अक्षयकोष स्थापना गरी देशका विभिन्न उद्यमशील किसानहरूलाई नगदसहित सम्मान गर्दै आएको जानकारी दिनुभयो ।
कार्यक्रममा कृषि ज्ञान केन्द्रका निमित्त प्रमुख दुर्गा बहादुर तिरुवाले सच्चा महिला किसानको मूल्याङ्कन गर्दै सहयोग गरेकोमा ज्ञानेश्वर फाउन्डेशनलाई धन्यवाद व्यक्त गर्नुभयो। उहाँले यस्तो सम्मानले ग्रामीण क्षेत्रमा कृषि पेशामा संलग्न किसानहरूलाई थप हौसला मिल्ने विश्वास व्यक्त गर्नुभयो ।
सम्मानित भएपछि दोमी शेर्पाले खुशी व्यक्त गर्दै फाउन्डेशन र कृषि ज्ञान केन्द्रप्रति आभार प्रकट गर्नुभयो। आफ्नो मेहनतको कदर भएकोमा गर्व लागेको बताउँदै उहाँले आगामी दिनमा अझै मेहनत गरेर कृषि पेशालाई निरन्तरता दिने प्रतिबद्धता व्यक्त प्रकट गर्नुभयो। ग्रामीण भेगमा पसिनाको मूल्य अझै कम आँकिँदै आएको अवस्थामा दोमी शेर्पाजस्ता महिला किसानलाई गरिएको यो सम्मानले कृषि पेशाको गरिमा बढाउनुका साथै अन्य किसानहरूका लागि प्रेरणाको स्रोत बनेको छ ।
Discussion about this post