सोलु गार्माका वडा अध्यक्षको कार्यकक्षमै स्वास्थ्य क्लिनिक : नेपालमै पहिलो अभ्यास

पौष १३, सोलुखुम्बु । सोलुखुम्बुको सोलुदुधकुण्ड नगरपालिका–७ गार्मामा वडा कार्यालय भवनमै गाउँघर स्वास्थ्य क्लिनिक सञ्चालनमा आएको छ । आइतबार हिमालयन केयर फाउण्डेशन र वडा कार्यालयको संयुक्त लगानीमा वडा आसपासका नागरिकलाई सहज स्वास्थ्य सेवा उपलब्ध गराउने उद्देश्यले क्लिनिकको सुरुवात गरिएको हो ।

क्लिनिक स्थापना सँगै स्थानीय कृष्णकुमारी कार्कीको स्वास्थ्य परीक्षण गरी सेवा प्रारम्भ गरिएको छ । वडा कार्यपालिका सदस्य भलाकाजी कार्कीका अनुसार यसअघि वडा कार्यालयमै स्वास्थ्य क्लिनिक नहुँदा स्थानीयवासी गार्मा स्वास्थ्य चौकी तथा जिल्ला अस्पताल फाप्लु धाउनुपर्ने बाध्यता थियो । क्लिनिक सञ्चालनमा आएसँगै उक्त समस्या अन्त्य हुने अपेक्षा गरिएको उहाँले बताउनुभयो ।

क्लिनिकको जिम्मेवारी स्मृति श्रेष्ठले सम्हाल्नुहुने भएको छ । क्लिनिकबाट परिवार नियोजन, सामान्य चोटपटकको उपचार, जेष्ठ नागरिक लक्षित सेवा लगायतका आधारभूत स्वास्थ्य सेवाहरू प्रदान गरिनेछ । कार्यक्रममा बोल्दै वडा अध्यक्ष सोनाम ग्याल्जेन शेर्पाले आफू निर्वाचित भएको तीन वर्ष पूरा भएसँगै विकासका आधारभूत कामलाई प्राथमिकतामा राख्दै आएको बताउनुभयो । जनताको नजिकको सरकार वडा कार्यालय र स्थानीय सरकार भएकाले स्वास्थ्यजस्ता सेवामा विशेष जोड दिइएको उहाँको भनाइ थियो ।

साथै, भित्तखर्क क्षेत्रमा स्वास्थ्य सेवामा देखिएको असहजताका विषयमा गुनासो आएको उल्लेख गर्दै त्यसको समाधानका उपाय खोजिने पनि उहाँले जानकारी दिनुभयो । क्लिनिकबाट सामान्य सेवासँगै दीर्घ रोगीका लागि समेत औषधि उपलब्ध गराइने बताइएको छ । कार्यक्रममा उपस्थित राजनीतिककर्मी तथा विभिन्न संस्थाका प्रतिनिधिहरूले वडा कार्यालयमै स्वास्थ्य क्लिनिक सञ्चालनमा ल्याएकोमा प्रशंसा गर्दै गुणस्तरीय सेवामा निरन्तर ध्यान दिनुपर्नेमा जोड दिएका थिए ।