सुत्यो नेपाल एअरलाइन्स, फाप्लुमा उडान १६ दिनदेखि ठप्प

असोज २०, सोलुखुम्बु । चाडपर्व नजिकिँदै गर्दा सरकारी स्वामित्वको नेपाल एयरलाइन्सले सोलुखुम्बुको फाप्लु विमानस्थलबाट काठमाडौंका लागि १९ दिनदेखि नियमित उडान गर्न सकेको छैन। विमानमा आएको समस्याका कारण असोज ४ गतेदेखि नेपाल एयरलाइन्सको फाप्लु–काठमाडौं उडान अवरुद्ध भएको हो। नागरिक उड्डयन प्राधिकरण फाप्लुका इन्चार्ज राजीव श्रेष्ठका अनुसार असोज ४ गतेदेखि नेपाल एयरलाइन्सको विमानले फाप्लु विमानस्थलमा उडान गरेको छैन।

लामो समयदेखि सरकारी विमान कम्पनीको उडान रोकिँदा फाप्लु–काठमाडौं हवाई सेवा निजी वायुसेवा कम्पनी समिटका चार्टर उडानमा निर्भर हुन पुगेको छ। प्रमुख चाडपर्व नजिकिँदै गर्दा यात्रुको चाप बढ्ने समयमा नियमित उडान अवरुद्ध हुँदा सर्वसाधारणदेखि पर्यटकसम्म प्रभावित भएका छन्। विशेषगरी दसैँ, तिहारलगायतका पर्वमा घर फर्किने तथा सोलुखुम्बु भ्रमणमा आउने यात्रुका लागि हवाई सेवा सहज हुनुपर्ने समयमा सरकारी विमान कम्पनीकै उडान रोकिँदा समस्या थपिएको हो।

नेपाल एयरलाइन्सका फाप्लु इन्चार्ज तेन्जी शेर्पाले भने विमानका पाइलटहरू तालिममा रहेकाले उडान प्रभावित भएको बताएका छन्। तर नागरिक उड्यन प्राधिकरण फाप्लुका इन्चार्ज राजिव श्रेष्ठले भने विमानमा प्राविधीक गडबढी भएका कारण उडान हुन नसकेको आफ्नो जानकारीमा रहेको बताएका छन् । नेपाल एयरलाइन्सले फाप्लुका लागि उडानमा प्रयोग गर्दै आएका सीमित विमानमध्ये एउटामा सामान्य प्राविधिक समस्या आउँदा समेत नियमित सेवा प्रभावित हुने अवस्था देखिएको छ ।

सोलुखुम्बुजस्तो पर्यटकीय जिल्लामा पर्यटकीय मौसम सुरु भइसकेको अवस्थामा हवाई सेवा अवरुद्ध हुँदा यसको प्रत्यक्ष असर यात्रु तथा पर्यटन व्यवसायमा समेत पर्ने देखिन्छ। चाडपर्व र पर्यटकीय सिजन एकैपटक सुरु भएको समयमा सरकारी विमान कम्पनीको सेवा लामो समयसम्म ठप्प रहनुले फाप्लु–काठमाडौं हवाई सेवाको विश्वसनीयतामाथि समेत प्रश्न उठाएको छ ।