खोटाङमा सर्वाधिक पुरस्कार राशीसहित ‘प्रभुराम राई कप’ आमन्त्रित खुला पुरुष फुटबल प्रतियोगिता हुँदै

अशोक साम्पाङ, खोटाङ । खोटाङ जिल्लामै सर्वाधिक पुरस्कार राशीसहितको आमन्त्रित खुला पुरुष फुटबल प्रतियोगिता ‘प्रभुराम राई कप’ आयोजना हुने भएको छ । प्रतियोगिताको तयारीबारे जानकारी दिन आज आयोजित पत्रकार सम्मेलनमार्फत आयोजकले औपचारिक जानकारी गराएका हुन् । आउँदो माघ ७ गतेदेखि ११ गतेसम्म सञ्चालन हुने उक्त प्रतियोगिता बुइपास्थित एलम्बर रंगशालामा आयोजना गरिनेछ । प्रतियोगिता A-11 साइज खुला पुरुष फुटबल विधामा हुनेछ । प्रतियोगितामा पहिलो पुरस्कार ३ लाख रुपैयाँ, दोश्रो पुरस्कार १ लाख ५१ हजार रुपैयाँ र दुई टिमलाई सान्त्वना पुरस्कारस्वरूप ५०-५० हजार रुपैयाँ प्रदान गरिने आयोजकले जनाएको छ । साथै उत्कृष्ट खेलाडीलाई २० हजार रुपैयाँ, विधागत पुरस्कार ६ जनालाई जनही १५-१५ हजार रुपैयाँ, र म्यान अफ द म्याच ९ जनालाई जनही २,५०० रुपैयाँ प्रदान गरिनेछ । यो पुरस्कार राशि खोटाङ जिल्लामै हालसम्मकै सर्वाधिक रहेको बताइएको छ ।

प्रतियोगिताको नाम ‘प्रभुराम राई कप’ पूर्व समाजसेवी तथा पूर्व गोर्खा सैनिक ८२ वर्षीय प्रभुराम राईको सम्मानमा उहाँकै नामबाट राखिएको हो । जीवनभर खेलकुदप्रति गहिरो रुचि र योगदान पु¥याउँदै आएका तथा खेल क्षेत्रको विकास र प्रोत्साहनमा निरन्तर सक्रिय रहनु भएका राईको सपना साकार पार्ने उद्देश्यले प्रतियोगिता आयोजना गरिएको बताइएको छ । पत्रकार सम्मेलनमा बोल्दै प्रतियोगिताका मुख्य आयोजक तथा उहाँका छोरा दिनेश राईले यो प्रतियोगिता बुबाको सपना र खोटाङको खेल क्षेत्रलाई उजागर गर्नका लागि आयोजना गरिएको बताए । दिनेश राई दिक्तेल रुपाकोट मझुवागढी नगरपालिका-१४, बुइपाका वडाध्यक्ष समेत हुन् ।

प्रतियोगिताको आयोजक प्रभुराम राई परिवार बुइपा, सह-आयोजक बुइपा ११ फुटबल क्लब, तथा संरक्षक जिल्ला फुटबल संघ, खोटाङ रहेको छ । प्रतियोगिता सञ्चालन हुने एलम्बर रंगशाला खोटाङ जिल्लामै व्यवस्थित र ऐतिहासिक खेल मैदानका रूपमा परिचित छ । आयोजकले प्रतियोगिताले जिल्लामा फुटबलको स्तर उकास्ने, स्थानीय खेलाडीलाई प्लेटफर्म दिने र खोटाङको खेल पर्यटन प्रवर्द्धनमा महत्वपूर्ण भूमिका खेल्ने विश्वास व्यक्त गरेका छन् । प्रतियोगितालाई भव्य र सफल बनाउन आयोजकले सम्पूर्ण खेलप्रेमी, सरोकारवाला निकाय तथा दर्शकहरूलाई उपस्थित भई सहयोग गर्न हार्दिक अनुरोध गरेका छन् ।