गार्मा र तामाखानीमा नयाँ भवन बन्दैः नगरपालिकाले माग्यो निर्माण बोलपत्र

पौष २१, सोलुखुम्बु । सोलुखुम्बु जिल्लाको सोलुदुधकुण्ड नगरपालिकाले दुई वटा भवन निर्माण कार्यका लागि बोलपत्र आह्वान गरेको छ । नगरपालिकाले वडा नं. ७ गार्माको वडा कार्यालय भवन निर्माण तथा तामाखानी स्वास्थ्य चौकी भवन निर्माण कार्यका लागि बोलपत्र माग गरेको हो । वडा कार्यालय भवन निर्माण कार्यको अनुमानित लागत भ्याट र पीएस सहित १ करोड ९४ लाख ८७ हजार ५ सय ५८ रुपैयाँ ४९ पैसा रहेको छ । सो कार्यका लागि ४ लाख ९० हजार रुपैयाँको बोलपत्र जमानत आवश्यक पर्ने वडा अध्यक्ष सोनाम ग्याल्जेन शेर्पाले जानकारी दिनुभयो ।

त्यसैगरी तामाखानी स्वास्थ्य चौकी भवन निर्माण कार्यको अनुमानित लागत १ करोड ८६ लाख ७१ हजार ७ सय ९४ रुपैयाँ ३५ पैसा तोकिएको छ । उक्त आयोजनाका लागि ४ लाख ६७ हजार रुपैयाँको बोलपत्र जमानत आवश्यक पर्ने सूचनामा उल्लेख छ ।

दुवै योजनाका लागि बोलपत्र कागजात शुल्क ३ हजार रुपैयाँ निर्धारण गरिएको छ । बोलपत्रको वैधता अवधि ९० दिन र बोलपत्र जमानतको अवधि १ सय २० दिन रहनेछ । नगरपालिकाले यी निर्माण कार्य सम्पन्न भएपछि स्थानीय सेवा प्रवाह थप प्रभावकारी हुने विश्वास व्यक्त गरेको छ ।