सल्लेरीमा समावेशी शिक्षा, अपाङ्गता तथा बाल सुरक्षा सम्बन्धी ४ दिने कार्यशाला सुरु

पौष २१, सोलुखुम्बु । सोलुखुम्बुको सदरमुकाम सल्लेरीमा समावेशी शिक्षा, अपाङ्गता तथा बाल सुरक्षा सम्बन्धी चार दिने कार्यशाला गोष्ठी सोमबारबाट सुरु भएको छ । जिल्लाका विभिन्न स्थानीय तहको समन्वय तथा रीड नेपालको आयोजनामा जनप्रतिनिधि र कर्मचारीका लागि उक्त कार्यशाला सञ्चालन गरिएको हो ।

आयोजकका अनुसार कार्यशालाले स्थानीय तहमा समावेशी शिक्षा प्रवद्र्धन, अपाङ्गता भएका बालबालिकाको अधिकार संरक्षण तथा बाल सुरक्षाका विषयमा नीति तथा व्यवहारिक ज्ञान अभिवृद्धि गर्ने लक्ष्य लिएको छ । कार्यक्रमको उद्घाटनमा सोलुदुधकुण्ड नगरपालिकाका मेयर नाम्गेल जाङ्बु शेर्पाले जिल्लाको शैक्षिक सुधारमा रीड नेपालको भूमिका अतुलनीय रहेको बताउँदै संस्थालाई धन्यवाद ज्ञापन गर्नुभयो । उहाँले विद्यालयको शैक्षिक गुणस्तर सुधारमा जनप्रतिनिधि र कर्मचारीको भूमिका अत्यन्त महत्वपूर्ण हुने कुरामा जोड दिनुभयो ।

त्यस्तै, रीड नेपालका शिक्षा कार्यक्रम प्रबन्धक सक बहादुर बुढाथोकीले यस तालिममार्फत जनप्रतिनिधि तथा कर्मचारीहरूले आफूहरूले सोचेभन्दा बढी सकारात्मक परिणाम दिन सक्ने विश्वास व्यक्त गर्नुभयो । कार्यशालामा जिल्लाका विभिन्न स्थानीय तहका उपप्रमुख, उपाध्यक्ष, प्रमुख प्रशासकीय अधिकृत तथा सम्बन्धित शाखाका कर्मचारीहरूको सहभागिता रहेको छ ।