भोजपुरमा किसानलाई प्रोत्साहन गर्न कृषि प्रदर्शनी

माघ २१, सोलुखुम्बु । स्थानीय कृषि उत्पादनको प्रवर्द्धन र बजारीकरणमार्फत किसानलाई आत्मनिर्भर बनाउने उद्देश्यले भोजपुर जिल्लाको टेम्केमैयुङ गाउँपालिका–७, कोटमा दुईदिने कृषि प्रदर्शनी आयोजना गरिएको छ। स्थनीयस्तरमा उत्पादन हुने कृषिउपजलाई एउटै स्थानमा प्रदर्शनीमार्फत सार्वजनिक गर्दै व्यावसायिक कृषि कर्मतर्फ किसानलाई आकर्षित गर्न कार्यक्रम आयोजना गरिएको हो। प्रदर्शनीमार्फत किसान र उपभोक्ताबीच प्रत्यक्ष सम्बन्ध स्थापित हुने तथा स्थानीय उत्पादनको बजार विस्तारमा सहयोग पुग्ने अपेक्षा गरिएको छ।

वडाध्यक्ष बालबहादुर खड्काका अनुसार वडाभित्र उत्पादन हुने कृषिउपजको प्रवर्द्धन र बजारीकरण गर्दै किसानलाई हौसला प्रदान गर्ने उद्देश्यले प्रदर्शनी आयोजना गरिएको हो। प्रदर्शनीमा वडामा उत्पादन हुने सुन्तला, अदुवा, मुला, केरा, बेसार, लसुन, कोदो, मकै, धानलगायतका विभिन्न कृषिउपज राखिएको छ। स्थानीय कृषकहरूले आफ्ना उत्पादन प्रत्यक्ष रूपमा उपभोक्तासमक्ष प्रस्तुत गर्न पाउँदा उत्साहित भएका छन्। कार्यक्रमले स्थानीय उत्पादनको पहिचान बढाउने, बजार पहुँच विस्तार गर्ने र किसानको आयआर्जनमा टेवा पुग्ने आयोजकको विश्वास छ।