सोलुखुम्बुमा निर्वाचन आचारसंहिता ः उम्मेदवारले ३३ लाख भन्दा बढी खर्च गर्न नपाउने 

माघ २२, सोलुखुम्बु ।  आसन्न प्रतिनिधि सभा सदस्य निर्वाचनका लागी सोलुखुम्बुमा आचारसंहिता सम्बन्धी अभिभुखिकरण सम्पन्न भएको छ ।  मुख्य निर्वाचन अधिकृतको कार्यालयमा सम्पन्न एक औपचारिक कार्यक्रमका बीच प्रतिनिधिसभा सदस्य निर्वाचनमा उम्मेदवारहरूले पालना गर्नुपर्ने आचारसंहिता, सञ्चार जगतले पालना गर्नुपर्ने आचारसंहिता र आम नागरिकले पानला गर्नुपर्ने आचारसंहिताको बारेमा अभिभुखिकरण गरिएको हो ।  

अभिमुकिखरणमा जिल्लाबाट प्रतिनिधि सभा सदस्य निर्वाचनमा उम्मेद्वारी दिएका व्यक्ति लगायत प्रतिनिधीहरुलाई आचारसंहिता सम्बन्धी जानकारी दिइएको छ ।  मुख्य निर्वाचन अधिकृत चन्द्र कुमार पोखरेलको अध्यक्षतामा सम्पन्न अभिभुखिकरण कार्यक्रममा नेपाली काङ्ग्रेस, नेकपा एमाले, नेपाली कम्युनिष्ट पार्टी, राष्ट्रिय प्रजातन्त्र पार्टी, राष्ट्रिय स्वतन्त्र पार्टी, उज्यालो नेपाल पार्टी, श्रम संस्कृति पार्टी सहितका प्रतिनिधि तथा उम्मेदवारहरूको उपस्थिति रहेको थियो ।

 अभिमुखिकरणमा उम्मेदवारहरूले गर्ने प्रचारप्रसारको हद, खर्च गर्ने रकमको सिमा, प्रयोग गर्ने साधनको सङ्ख्या लगायतको बारेमा सचेत गराइएको छ । निर्वाचनमा हिमाली जिल्ला सोलुखुम्बुमा ३३ लाख रुपैयाँ खर्च गर्न पाउने सिमा तोकिएको छ ।  यस्तै उक्त खर्च गर्ने रकमका लागी छुट्टै खाता खोल्नुपर्ने जनाइएको छ ।  यस्तै अभिमुखीकरणमा सामाजिक सञ्जाल मार्फत हुन सक्ने मिस इन्फरमेर्सन, डिसइन्र्फमेसन, एआइको प्रयोग, कमेन्ट, डिप फेक जस्ता गतिविधिका बारेमा समेत सचेत गराइएको छ ।

 उम्मेदवारहरूले प्रचार गर्ने क्रममा जम्मा गर्ने भिड, प्रयोग गर्ने झण्डा लगायतकाे सिमा तोकिएको मुख्य निर्वाचन अधिकृत पोखरेले बताउनुभयो ।  अभिमुखीकरण कार्यक्रममा प्रमुख जिल्ला अधिकारी लिला केसी पाण्डे, नेपाल प्रहरीका डिएसपी मनोजित कुवँर, सस्त्र प्रहरीका डिएसपी, नेपाली सेनाका मेजर भलाकाजी श्रेष्ठ, जिल्ला निर्वाचन कार्यालयका प्रमुख दिपेन्द्र राज अधिकारी, कोष तथा लेखा नियन्त्रण कार्यालयका प्रमुख लगायतको उपस्थीति रहेको थियो ।