“परिवर्तन चाहिन्छ” भन्दै ६८ जना नेकपामा प्रवेश, वाकुमा बढ्यो राजनीतिक सरगर्मी

फागनु १, सोलुखुम्बु । सोलखुूम्बुको माप्य दुधकोसी गाउँपालिका वडा नं. ६ वाकुमा राजनीतिक तरंग सिर्जना भएको छ। नेकपा (एमाले) र नेपाली कांग्रेस परित्याग गर्दै ६८ जना स्थानीय नेता–कार्यकर्ताले नेपाली कम्युनिष्ट पार्टी मा औपचारिक रूपमा प्रवेश गरेका छन् ।

घरदैलो अभियानका क्रममा सोलुखुम्बु जिल्ला स्थित वाकुमा पुगेका नेकपाका जिल्ला उम्मेद्वारसहितको टोलीसमक्ष उनीहरूले पार्टी प्रवेशको घोषणा गरेका हुन् । कार्यक्रम स्थलमै प्रवेश गर्नेहरूको भीड देखिएको थियो भने स्थानीय बासिन्दाको उल्लेख्य उपस्थिति रहेको बताइएको छ । नवप्रवेशीहरूका अनुसार पुराना दलहरूबाट जनअपेक्षा पूरा नभएको, विकास निर्माणमा ढिलाइ भएको तथा स्थानीय मुद्दामा बेवास्ता गरिएको कारण पार्टी परित्याग गर्नुपरेको बताएका छन् । “हामी परिवर्तन चाहन्छौँ, स्पष्ट नीति र जनमुखी एजेन्डा चाहिन्छ,” नवप्रवेशीले बताएका छन् ।

उता नेकपाका जिल्ला उम्मेद्वार असिम राईले यसलाई “जनताको विश्वास र परिवर्तनको संकेत” भन्दै आगामी निर्वाचनमा पार्टीको जित सुनिश्चित हुने दाबी गर्नुभएको छ । उहाँले वाकुबाट सुरु भएको समर्थन लहर जिल्लाभर फैलिने विश्वास व्यक्त गर्नुभयो । स्थानीय राजनीतिक विश्लेषकहरूका अनुसार माप्य दुधकोसी–६ मा भएको यो सामूहिक प्रवेशले आगामी चुनावी समीकरणमा उल्लेख्य प्रभाव पार्न सक्ने देखिन्छ । वाकु क्षेत्र यसअघि एमाले र कांग्रेसको बलियो पकड मानिँदै आएको थियो । यस घटनापछि वाकुमा राजनीतिक सरगर्मी ह्वात्तै बढेको छ । आगामी दिनमा अन्य वडाहरूमा पनि यस्तै प्रवेशको क्रम जारी रहने नेकपाको दाबी छ ।