रास्वपा कोशी प्रदेश पर्यटन विभाग प्रमुख शेर्पा उज्यालो नेपाल पार्टीमा प्रवेश

फागुन ५, सोलुखुम्बु । राष्ट्रिय स्वतन्त्र पार्टी (रास्वपा) का कोशी प्रदेश पर्यटन विभाग प्रमुख लाक्पा गेल्जेन शेर्पाले आफ्नो जिम्मेवारीबाट राजीनामा दिनुभएको छ । उहाँले पार्टी परित्याग गर्दै उज्यालो नेपाल पार्टीमा औपचारिक प्रवेश गर्नुभएको हो । शेर्पालाई उज्यालो नेपाल पार्टीको केन्द्रीय कार्यालयमा आयोजित एक कार्यक्रममा पार्टी अध्यक्ष कुलमान घिसिङले ब्याच लगाएर स्वागत गर्नुभएको थियो ।

कार्यक्रममा बोल्दै अध्यक्ष घिसिङले शेर्पाको आगमनले पार्टी संगठनलाई थप मजबुत बनाउने विश्वास व्यक्त गर्नुभयो । उहाँले आगामी निर्वाचनमा उज्यालो नेपाल पार्टीका उम्मेदवारलाई सशक्त बनाउँदै जनताको मुद्दालाई प्राथमिकतामा राखेर अघि बढ्ने प्रतिबद्धता जनाउनुभयो ।

नवप्रवेशी शेर्पाले उज्यालो नेपाल पार्टीको विचार, नीति र नेतृत्वप्रति विश्वास व्यक्त गर्दै देशमा सुशासन, विकास र समृद्धिको एजेन्डा स्थापित गर्न आफू सक्रिय रूपमा लाग्ने बताउनुभयो । उहाँले कोशी प्रदेशमा पर्यटन क्षेत्रको विकास, रोजगारी सिर्जना र स्थानीय अर्थतन्त्र सुदृढीकरणमा विशेष पहल गर्ने उल्लेख गर्नुभयो। उहाँको प्रवेशसँगै कोशी प्रदेशमा उज्यालो नेपाल पार्टीको संगठनात्मक सञ्जाल विस्तार हुने विश्वास गरिएको छ ।