चुनावी माहोल तातेसँगै सोलुखुम्बुमा आचारसंहिताको निगरानी कडा

फागुन ६, सोलुखुम्बु । सोलुखुम्बुमा प्रतिनिधि सभा सदस्य निर्वाचन नजिकिँदै जाँदा जिल्लाका सरोकारवालालाई निर्वाचन आचारसंहिताको प्रभावकारी कार्यान्वयनमा जोड दिन आग्रह गरिएको छ। बुधबार मुख्य निर्वाचन अधिकृतको कार्यालय, सोलुखुम्बुले आयोजना गरेको कार्यक्रममा सम्पूर्ण सरोकारवालालाई आचारसंहिता कडाइका साथ पालना गर्न निर्देशन दिइएको हो । कार्यक्रममा उम्मेदवारका प्रतिनिधि, अनुगमन अधिकृत, सुरक्षाकर्मी तथा सञ्चारकर्मीहरूलाई आचारसंहिता पालना गर्न मुख्य निर्वाचन अधिकृत चन्द्रकुमार पोखरेलले निर्देशन दिनुभयो ।

उहाँले जिल्लाका केही उम्मेदवारहरूले मुख्य निर्वाचन अधिकृतको कार्यालयबाट सवारी साधन अनुमति नलिएको, दुई जना उम्मेदवारले नयाँ बैंक खाता नखोलेको तथा सभा सम्मेलनका क्रममा तोकिएको भन्दा बढी सवारी साधन प्रयोग गरिएको जानकारी दिनुभयो । साथै, पार्टीका झन्डा समेत तोकिएको मापदण्डभन्दा बढी बोकेको पाइएकाले नियमअनुसार मात्र प्रयोग गर्न आग्रह गर्नुभयो ।

त्यसैगरी प्रमुख जिल्ला अधिकारी लिला कुमारी के.सी. पाण्डेले निर्वाचनलाई स्वच्छ, निष्पक्ष, पारदर्शी र विश्वसनीय बनाउन सबै पक्ष जिम्मेवार हुनुपर्ने बताउनुभयो । उहाँले निर्वाचन आचारसंहितालाई आधार मानेर मात्र गतिविधि सञ्चालन गर्न आग्रह गर्नुभयो ।

कार्यक्रममा उपस्थित विभिन्न राजनीतिक दलका प्रतिनिधिहरूले आफ्नो दल वा कार्यकर्ताबाट आचारसंहिता विपरीत गतिविधि भएको पाइएमा सचेत र जिम्मेवार ढंगले सुधार गर्ने प्रतिबद्धता जनाएका छन् । साथै, आसन्न निर्वाचनलाई स्वच्छ, निष्पक्ष र पारदर्शी रूपमा सम्पन्न गर्न आफूहरू प्रतिबद्ध रहेको बताएका छन् ।