फागुन ६, खोटाङ । खोटाङमा चुनावी सरगर्मी बढेसँगै सुरक्षा सतर्कता पनि कडाइका साथ अघि बढाइएको छ । चुनावी प्रचार–प्रसार तीव्र भइरहेका बेला सम्भावित दुर्घटनालाई मध्यनजर गर्दै सवारी चेकजाँचलाई प्रभावकारी बनाइएको हो । विशेषगरी मध्य पहाडी लोकमार्ग क्षेत्रमा दैनिक रूपमा सवारी जाँच गरिँदै आएको छ । सुरक्षित तथा सहज यात्राका लागि मापसे (मद्यपान) चेक, ध्वनी प्रदूषण नियन्त्रण, र मालवाहक सवारीसाधनमा जडान गरिएका ठूला प्रेसर हर्न हटाउने अभियान सञ्चालन गरिएको छ । यसैगरी दिक्तेल बजार परिसरमा सचेतनामूलक बोर्ड राखी चालक तथा यात्रुलाई ट्राफिक नियम पालना गर्न आग्रह गरिएको छ ।
ट्राफिक प्रहरी प्रमुख बाबुराम न्यौपाने को अगुवाइमा सञ्चालन भइरहेको यो अभियानमा सवारी चालकलाई आवश्यक सल्लाह–सुझाव दिइँदै आएको छ । चुनावी गतिविधि बढ्दै जाँदा सुरक्षा र अनुशासनलाई सँगसँगै अघि बढाउने उद्देश्यले गरिएको यो पहलले खोटाङमा सुरक्षित यात्रा वातावरण निर्माणमा महत्वपूर्ण योगदान पु¥याउने अपेक्षा गरिएको छ । चुनावी उत्साहसँगै जिम्मेवार यात्रा संस्कार विकास गर्न सबै पक्षको सहकार्य अपरिहार्य देखिएको छ ।
Discussion about this post