खोटाङमा मतदान अधिकृतको अभिमुखीकरण सुरु, कुन पालिकामा कति मतदाता ? कति मतदान स्थल र केन्द्र ?

अशोक साम्पाङ, खोटाङ । आसन्न प्रतिनिधिसभा सदस्य निर्वाचनका लागि खोटाङमा खटाइने मतदान अधिकृत तथा सहायक मतदान अधिकृतहरुलाई बिहीबारदेखि अभिमुखीकरण तालिम सुरु गरिएको छ । सदरमुकामस्थित बहुमुखी क्याम्पसमा सुरु गरिएको तालिमको पहिलो दिन करिब दुई सय अधिकृतले निर्वाचन प्रक्रिया, आचारसंहिता, मतपत्र व्यवस्थापन, मतगणना प्रक्रिया तथा आफ्नो जिम्मेवारीबारे विस्तृत प्रशिक्षण लिने छन् । बाँकी अधिकृतहरुलाई दोस्रो दिन तालिम प्रदान गरिने निर्वाचन कार्यालयले जनाएको छ । बिहीबार साकेला गाउँपालिका, दिक्तेल रुपाकोट मझुवागढी नगरपालिका, रावाबेसीँ गाउँपालिका, हलेसी तुवाचुङ नगरपालिका तथा अस्थायी मतदान केन्द्रका रूपमा रहने जिल्ला समन्वय समिति कार्यालय र कारागार कार्यालयमा खटाइने अधिकृतहरुले तालिम लिएका छन् । शुक्रबार बराहपोखरी गाउँपालिका, जन्तेढुङ्गा गाउँपालिका, खोटेहाङ गाउँपालिका, दिप्रुङ चुइचुम्मा गाउँपालिका, केपिलासगढी गाउँपालिका, ऐसेलुखर्क गाउँपालिका तथा जगेडामा रहेका अधिकृतहरुलाई तालिम दिइने कार्यक्रम रहनेछ ।

प्रतिनिधिसभातर्फ एक मात्र निर्वाचन क्षेत्र रहेको खोटाङमा आगामी २१ फागुनमा निर्वाचन हुँदैछ । निर्वाचनका लागि जिल्लाभर १३६ मतदान स्थल र दुई अस्थायी केन्द्रसहित १९७ मतदान केन्द्र निर्धारण गरिएको छ । जिल्ला प्रशासन कार्यालय खोटाङकी सहायक प्रमुख जिल्ला अधिकारी कोपिला राईका अनुसार प्रतिनिधिसभा सदस्य निर्वाचन एकीकृत सुरक्षा योजनाअन्तर्गत गरिएको निरीक्षण र अनुगमन प्रतिवेदनका आधारमा जिल्लाका २१ मतदान स्थललाई अतिसंवेदनशील, ६४ वटालाई संवेदनशील र ५१ वटालाई सामान्य श्रेणीमा वर्गीकरण गरिएको छ । जिल्लामा कुल एक लाख ४७ हजार १२० मतदाता रहेका छन् । जसमध्ये ७७ हजार ६५६ पुरुष र ६९ हजार ४६४ महिला मतदाता छन् ।

स्थानीय तहगत विवरणअनुसार दिक्तेल रुपाकोट मझुवागढी नगरपालिकामा सबैभन्दा बढी ३५ हजार ७६० मतदाता रहेका छन् । जहाँ २४ मतदान स्थल र ४५ मतदान केन्द्र तोकिएका छन् । हलेसी तुवाचुङ नगरपालिकामा २१ हजार ९२८ मतदाता रहेका छन् । यहाँ १८ मतदान स्थल र २७ मतदान केन्द्र रहेको छ । खोटेहाङ गाउँपालिकामा १५ हजार १७ मतदाता रहेका छ । १५ मतदान स्थल र २० मतदान केन्द्र निर्धारण गरिएको छ । दिप्रुङ चुइचुम्मा गाउँपालिकामा १३ हजार ५८६ मतदाता छन् । यहाँ १३ मतदान स्थल र १८ मतदान केन्द्र रहेका छन् । ऐसेलुखर्क गाउँपालिकामा ११ हजार ८८३ मतदाता छन् । यस पालिकामा १३ मतदान स्थल र १५ मतदान केन्द्र तोकिएका छन् ।

त्यसैगरि, जन्तेढुङ्गा गाउँपालिकामा १० हजार २३९ मतदाता रहेका छन् । यहाँ १५ मतदान स्थल र १२ मतदान केन्द्र रहेका छन् । केपिलासगढी गाउँपालिकामा १० हजार १७८ मतदाता छन् । १३ मतदान स्थल र १६ मतदान केन्द्र निर्धारण गरिएको छ । रावाबेसीँ गाउँपालिकामा ९ हजार ७३० मतदाता रहेका छन् । यहाँ १० मतदान स्थल र १४ मतदान केन्द्र छन् । बराहपोखरी गाउँपालिकामा ९ हजार ३५४ मतदाता छन् । १० मतदान स्थल र १३ मतदान केन्द्र तोकिएका छन् । साकेला गाउँपालिकामा ८ हजार ६४५ मतदाता रहेका छन् । यहाँ ८ मतदान स्थल र १२ मतदान केन्द्र छन् । खोटाङमा यस पटक १३ राजनीतिक दल र दुई स्वतन्त्र उम्मेदवारसहित कुल १५ जना उम्मेदवार चुनावी प्रतिस्पर्धामा रहेका छन् । निर्वाचन नजिकिँदै जाँदा प्रशासन, सुरक्षा निकाय र निर्वाचन कार्यालयले आवश्यक तयारीलाई तीव्र बनाएका छन् ।