सोलुखुम्बुमा दर्ता बिना होटल–पसल सञ्चालन र मनलाग्दी दरभाउको गुनासो

फागुन १५, साेलुखुम्बु ।    सोलुखुम्बु जिल्लाका कतिपय होटल तथा पसलहरू वैधानिक दर्ता प्रक्रिया पूरा नगरी सञ्चालन भइरहेको तथा उपभोक्तासँग मनलाग्दी दरभाउ लिएको गुनासो बढ्दै गएको छ। स्थानीय उपभोक्ता तथा सेवाग्राहीहरूले एउटै वस्तु र सेवामा फरक–फरक मूल्य असुल गरिएको भन्दै सम्बन्धित निकायको ध्यानाकर्षण गराएका छन्।

प्राप्त गुनासोअनुसार केही व्यवसायीहरूले मूल्यसूची सार्वजनिक नगरी उपभोक्तासँग मनपरी शुल्क लिने गरेका छन्। यसले बजारमा अस्वस्थ प्रतिस्पर्धा मात्र होइन, उपभोक्ता अधिकारको समेत उल्लंघन भएको सरोकारवालाहरूको भनाइ छ।

उपभोक्ता अधिकार ऐनको उल्लंघन?

उपभोक्ता संरक्षण ऐन, २०७५ अनुसार व्यवसाय सञ्चालन गर्दा अनिवार्य रूपमा दर्ता हुनुपर्ने, मूल्यसूची स्पष्ट रूपमा प्रदर्शन गर्नुपर्ने र उपभोक्तालाई ठगी वा भ्रामक सूचना दिन नहुने प्रावधान छ। ऐनको दफा १६ र १८ ले वस्तु तथा सेवाको मूल्य स्पष्ट उल्लेख गर्न र उपभोक्तालाई भ्रममा पार्ने कार्य नगर्न निर्देश गरेको छ। उल्लंघन भएमा जरिवाना तथा कारबाहीको व्यवस्था समेत ऐनमा उल्लेख छ।

उपभोक्ताको माग : पारदर्शिता र नियमित अनुगमन

स्थानीय उपभोक्ताहरूले बजारमा एकरूपता कायम गर्न, मूल्यसूची अनिवार्य प्रदर्शन गराउन र दर्ता प्रक्रिया कडाइका साथ कार्यान्वयन गर्न माग गरेका छन्। “सदरमुकाममै यस्तो अवस्था छ भने ग्रामीण क्षेत्रको अवस्था कस्तो होला?” भन्ने प्रश्नसमेत उठ्न थालेको छ।बजार व्यवस्थापनलाई पारदर्शी, प्रतिस्पर्धी र उपभोक्ता–मैत्री बनाउन सरोकारवाला निकायले तत्काल प्रभावकारी कदम चाल्नु आवश्यक देखिएको छ।