सरकारी सवारी साधन दुरुपयोग नगर्न जिल्ला प्रशासन कार्यालय सोलुखुम्बुको आग्रह

फागुन १६, सोलुखुम्बु । जिल्ला प्रशासन कार्यालय सोलुखुम्बुले राजनीतिक कार्यक्रममा सरकारी सवारी साधन प्रयोग नगर्न आग्रह गरेको छ । सहायक प्रमुख जिल्ला अधिकारी देवेन्द्र सुवेदीले शुक्रबार एक सूचना जारी गर्दै सरकारी सवारी साधनको दुरुपयोग नगर्न सबै सरोकारवालालाई सचेत गराउनुभएको हो ।

फागुन २१ गते हुने प्रतिनिधि सभा सदस्य निर्वाचनलाई स्वच्छ, स्वतन्त्र, निष्पक्ष, विश्वसनीय, भयरहित, शान्तिपूर्ण तथा सौहार्दपूर्ण वातावरणमा सम्पन्न गराउने उद्देश्यले प्रशासनले विशेष सतर्कता अपनाउन आग्रह गरेको जनाएको छ । निर्वाचनको समयमा जनप्रतिनिधि तथा सरकारी कर्मचारीबाट सरकारी सवारी साधनको दुरुपयोग हुन सक्ने सम्भावनालाई मध्यनजर गर्दै यस्तो निर्देशन जारी गरिएको हो ।

प्रचलित कानुन, निर्वाचन आचारसंहिता तथा सम्बन्धित निर्देशनअनुसार सरकारी सवारी साधन केवल अत्यावश्यक सरकारी कार्यका लागि मात्र प्रयोग गर्न पाइने व्यवस्था छ । निर्वाचन प्रचार–प्रसार, मतदाता ओसारपसार, राजनीतिक गतिविधि वा कुनै पनि प्रकारका निर्वाचनसम्बन्धी कार्यमा सरकारी सवारी साधनको प्रयोग पूर्ण रूपमा निषेध गरिएको प्रशासनले स्पष्ट पारेको छ ।

जिल्ला प्रशासन कार्यालयले निर्वाचनको निष्पक्षता र विश्वसनीयता कायम राख्न सबै राजनीतिक दल, जनप्रतिनिधि, सरकारी कर्मचारी तथा सम्बन्धित पक्षलाई नियमको पालना गर्न अनुरोध गरेको छ ।