सोलुखुम्बुका ९६ कृषि फर्मलाई १ करोड ३० लाख बढी अनुदान

जेठ २७, सोलुखुम्बु । कृषि ज्ञान केन्द्र सोलुखुम्बुले यो वर्ष १ करोड ३० लाख बढी अनुदान वितरण गरेको छ । कार्यालयले विभिन्न ८ ओटा कार्यक्रम मार्फत कृषकहरुलाई चालु आर्थिक वर्षको हाल सम्म १ करोड ३१ लाख रुपैयाँ बराबरको मेसिन सामाग्री उपकरण वितरण गरेको हो ।

प्रदेश सरकारबाट ज्ञान केन्द्रका लागी प्राप्त उक्त बजेट मध्येबाट विभिन्न ७७ कृषि समुह तथा कृषि फर्मलाई अनुदान स्वरुप उक्त रकम बराबरको कृषि औजार, सामाग्री वितरण गरिएको हो । कार्यालयका अनुसार अनुदानका लागी आएका आवेदनहरू मध्येबाट छनौट गरेर ९६ वटा कृषि फर्म वा समुह हरुलाई अनुदान उपलब्ध गराइएको हो ।

कार्यालयका सुचना अधिकारी कुल बहादुर राईका अनुसार यो वर्ष जिल्लाका लागी आएका ८ ओटा कार्यक्रमहरुमा रहेका ७७ कोटाबाट ९६ जना लाई अनुदान दिइएको हो । जसमध्ये प्रोटैक्टेड हर्टिकल्चर प्रमोशन कार्यक्रममा रहेको ५ वटा कोटामा निर्धारित २५ लाख बजेटलाई ८ ओटा कृषि फर्म तथा समुहमा वितरण गरिएको छ ।

यस्तै व्यवसायिक फलफुल बगैँचा स्थापना कार्यक्रमका लागी निर्धारित ५ कोटामा विनियोजित १५ लाख बजेट १० वटालाई, राजमार्ग लक्षित तरकारी उत्पादन कार्यक्रम अन्तर्गत ५ कोटामा विनियोजित १५ लाख बजेट ५ वटालाई, रैथाने वाली प्रवर्धनका लागी निर्धारित एउटा कोटामा विनियोजित ३ लाख बजेट २ वटालाई कृषि फर्म तथा समुहहरूलाइ वितरण गरिएको छ ।

यस्तै महिला लक्षित विपन्न तथा पिछडिएको वर्गको लागी निर्धारित ८ कोटामा विनियोजित ८ लाख बजेट ८ वटालाई, युवा लक्षित च्याउ, मह तरकारी उत्पादन कार्याक्रममा निर्धारित ४० कोटामा विनियोजित ४० लाख बजेट ४० वटालाई, कुलबुट खरिद तथा जडानमा सहयोग कार्यक्रममा निर्धारित ३ कोटामा विनियोजित १५ लाखमा ३ वटालाई र मागमा आधारित कार्यक्रममा निर्धारित १० कोटामा विनियोजित १० लाखमा २० वटा कृषि समुह वा फर्मलाई अनुदान उपलब्ध गराइएको हो ।

यस्तै संघिय सरकारबाट प्राप्त व्यवसायिक कृषि उत्पादन केन्द्र तरकारी ब्लक विकास कार्यक्रमका लागी प्राप्त २० लाख रुपैयाँ बजेट अनुदानमा उपलब्ध गराइएको हो । ज्ञान केन्द्रबाट सञ्चालित कार्यक्रमको प्रभावकारीता हाल सम्म समग्रमा सन्तोषजनक रहेको केन्द्रका सुचना अधिकारी कुल बहादुर राईले बताउनुभयो । कार्यालयले आगामी आर्थिक वर्षका लागी पनि बजेट प्रस्ताव गरिसकेको उहाँले बताउनुभएको छ ।