सोलुखुम्बुमा धान खेती घट्ने, अघिल्लो वर्षको तुलनामा ३ सय हेक्टर कम

जेठ २७, सोलुखुम्बु । हिमाली जिल्ला सोलुखुम्बुमा यो वर्ष धान रोपाई गर्ने क्षेत्रफल ३ सय हेक्टर घटेको छ । गत वर्षको तुलनामा जिल्लामा यो वर्ष धान रोपाई गर्ने क्षेत्रफल घटेको हो । जिल्लामा गत वर्ष १ हजार ५ सय २५ हेक्टर क्षेत्रफलमा धान खेती भएको थियो ।

तर यो वर्ष उक्त क्षेत्रफल ३ सय हेक्टरले घटेर १ हजार २ सय २५ हेक्टर क्षेत्रफलमा झरेको कृषि ज्ञान केन्द्र सोलुखुम्बुले जनाएको छ । कार्यालयका सुचना अधिकारी कुल बहादुर राईका अनुसार खेतियोग्य जमिन ४५ हजार ३ सय ५८ हेक्टर रहेकोमा यो वर्ष उक्त क्षेत्रफलमा मात्रै धान खेती हुने अनुमानित तथ्याङ्क कृषि तथा पशुपंक्षी विकास मन्त्रालयले पठाएको हो ।

गत वर्ष जिल्लाभर ३ हजार ५१ मेट्रिक टन धान उत्पादन भएकोमा यस वर्ष धान खेती गर्ने जमिन घटेसँगै उत्पादन स्वतः घट्ने कार्यालयले जनाएको छ । जिल्लामा विभिन्न कारण वर्षेनी धान खेती गर्ने क्षेत्रफल घटिरहेको छ । प्राकृतिक कारणहरु धान फल्ने फुल्ने बेलामा आउने हावाहुरीका कारण, असिना पानीका कारण पनि धान खेती घट्ने गरेको कार्यालयको भनाई छ । किसानहरुले घुम्ती वाली, अलैंची लगायत लगाउँदा पनि धान खेती घट्ने गरेको हो । सोलुखुम्बुका खुम्बु गाउँपालिका बाहेक सबै पालिकामा धान खेती हुने गरेको छ ।

गत वर्ष यसैवीच हिमाली जिल्ला सोलुखुम्बुमा यो वर्षको धान रोपाई सुरु भएको छ । जिल्लाको थुलुङ दुधकोशी गाउँपालिका वडा नम्बर २ बाट यो वर्षको पहिलो धान रोपाई सुरु भएको कार्यालयले जनाएको हो ।

हिमाली भेग रहेको जिल्लामा हरेक वर्ष जेठ अन्तिम हप्ताबाट धान रोपाई सुरु हुने गरेको र यो वर्ष पनि सोही अनुरुप धान रोपाई सुरु भएको कृषि ज्ञान केन्द्र सोलुखुम्बुले जनाएको छ । कार्यालयले आगामी असार ७ गतेबाट जिल्लामा भएको धान खेतीको औपचारीक बुलेटिन नियमित जानकारी गराउने पनि कार्यालयले जनाएको छ ।