सोलुखुम्बुमा ऋषिधन थुलुङले सार्वजनिक गरे निर्वाचन खर्च विवरण

चैत्र १, सोलुखुम्बु । राष्ट्रिय स्वतन्त्र पार्टीका प्रतिनिधिसभा सदस्य उम्मेदवार ऋषिधन थुलुङ राईले आफ्नो निर्वाचन अभियानमा भएको खर्च विवरण सार्वजनिक गर्नुभएको छ। उहाँले उक्त विवरण जिल्ला निर्वाचन कार्यालयमा बुझाउनुभएको हो। थुलुङका अनुसार प्रतिनिधिसभा सदस्य निर्वाचन ऐन, २०७४ को दफा ७२ तथा निर्वाचन आयोगले स्वीकृत गरेको निर्वाचन आचारसंहिताअनुसार फागुन २९ गते खर्च विवरण पेश गरिएको हो।

सार्वजनिक गरिएको विवरणअनुसार निर्वाचन अभियानका क्रममा कुल ११ लाख ७५ हजार ८५ रुपैयाँ खर्च भएको उल्लेख गरिएको छ। जसअनुसार प्रचार–प्रसार सामग्रीमा ९१ हजार ७ सय १० रुपैयाँ, विद्युतिय सञ्चार माध्यमबाट प्रचारमा १ लाख ६५ हजार रुपैयाँ, सवारी साधन खर्चमा ६ लाख २ हजार ५ सय रुपैयाँ, प्रतिनिधि खाना–खाजा खर्चमा २ लाख ७५ हजार ५ सय २५ रुपैयाँ, खादा खरिदमा ४० हजार १० रुपैयाँ तथा अन्य शीर्षकमा ३ सय ४० रुपैयाँ खर्च गरिएको जनाइएको छ। उक्त खर्च विवरण निर्वाचन ऐन तथा आचारसंहिताअनुसार पारदर्शिता कायम गर्न सार्वजनिक गरिएको बताइएको छ।