एउटै निर्वाचनमा साेलुबाट ३ सांसद निर्वाचित

चैत्र ४, सोलुखुम्बु । हिमाली जिल्ला सोलुखुम्बुबाट यस पटक तिन जना सांसद एउटै दलबाट प्रतिनिधीत्व गर्दै छन् । प्रतिनिधि सभाको आगामी कार्यकालमा सोलुखुम्बु जिल्लाबाट तीन जना सांसदको प्रतिनिधित्व हुने भएको हो । एकमात्र निर्वाचन क्षेत्र रहेको जिल्लाबाट यसपटक तीन जना सांसदले संघीय संसदमा प्रतिनिधित्व गर्दैछन् ।

प्रत्यक्ष निर्वाचनतर्फ नेपाली कांग्रेसका उम्मेदवार प्रकाशसिंह कार्कीले विजय हासिल गरि संसदीय यात्रा तय गरिसक्नुभएको छ भने अन्य २ सांसदहरु समेत चयन भइसकेका छन् । नेपाली काङ्ग्रेसले निर्वाचन आयोगलाई र्दिएको बन्द सूचीका आधारमा सोलुखुम्बुकाट अन्य २ जना सांसद समानुपातीक निर्वाचन प्रणाली मार्फैत चुनिएका छन् । नेपाली कांग्रेस केन्द्रीय कार्यसम्पादन समितिको पछिल्लो निर्णयअनुसार सोलुखुम्बुकी रिना उप्रेती र गीता गुरुङलाई प्रतिनिधि सभा सदस्यका लागि सिफारिस गरिएको हो ।

जिल्लाबाट समानुपातीकमा खस आर्य कोटाबाट उप्रेती र आदिवासी जनजाति कोटाबाट गुरुङ सिफारिस भएका छन् । गुरुङ नेपाल विद्यार्थी संघकी केन्द्रीय सदस्य समेत हुनुहुन्छ । कांग्रेसले आइतबारको बैठकबाट उप्रेती र गुरुङसहित कुल २० जनाको नाम निर्वाचन आयोगमा पठाउने तय गरेको छ । यसरी एउटै जिल्लाबाट प्रत्यक्ष र समानुपातिक गरी तीन जना सांसद पुग्ने भएपछि सोलुखुम्बुको राजनीतिक वृत्तमा नयाँ उत्साह देखिएको छ ।