सोलुखुम्बुमा चट्याङ लाग्दा ८ जना घाइते, एकको अवस्था गम्भीर

चैत्र १३, सोलुखुम्बु । सोलुखुम्बु जिल्लाको महाकुलुङ गाउँपालिका–२ पेल्माङमा चट्याङ लाग्दा ८ जना घाइते भएका छन्। आज साँझ करिब ६ बजेतिर स्थानीय सञ्चमान बिक, बुद्ध बहादुर बिक र असिम रसाइलीको घर आसपासमा अचानक परेको चट्याङबाट उनीहरू घाइते भएका हुन्। घटनालगत्तै घाइतेहरूलाई बुङ आधारभूत अस्पतालमा उपचारका लागि ल्याइएको प्रहरीले जनाएको छ।

प्रहरीका अनुसार घाइतेमध्ये १३ वर्षीय सुदिप बिकको अवस्था गम्भीर रहेको छ। उनको नाक र मुखबाट रगत बगिरहेको र बोल्न नसक्ने अवस्था रहेको छ । त्यस्तै, १६ वर्षीय ओसन बिकको अवस्था मध्यम रहेको छ। उनी पनि बोल्न नसक्ने अवस्थामा रहेका छन्। अन्य ६ जनाको अवस्था सामान्य रहेको प्रहरीले जनाएको छ।

घाइते हुनेमा ४ वर्षीय करण बिक, ११ वर्षीया जुनिता रसाइली, २ वर्षीया सृजना रसाइली, २६ वर्षीया सरस्वती बिक, १३ महिनाकी युनिसा बिक र २२ वर्षीया अमृता रसाइली रहेका छन्। घटनाबाट कुनै पनि भौतिक संरचना तथा चौपायामा क्षति नभएको प्रहरीले जनाएको छ। घटनाबारे थप अनुसन्धान भइरहेको जिल्ला प्रहरी कार्यालय सोलुखुम्बुले जनाएको छ।