सहकारी ठगी आरोपमा चार जना सञ्चालक पक्राउ

चैत्र २१, सोलुखुम्बु । बचतकर्ताहरूको रकम फिर्ता नगरी ठगी गरेको आरोपमा ललितपुरस्थित एक सहकारी संस्थाका चार जना सञ्चालकलाई प्रहरीले पक्राउ गरेको छ। प्रहरीका अनुसार गोरखा सेभिङ एण्ड क्रेडिट सहकारी संस्था लिमिटेड सातदोबाटो, ललितपुर मा रहेको सहकारीका सञ्चालकहरूलाई नियन्त्रणमा लिइएको हो। पक्राउ पर्नेहरूमा ओखलढुंगाका तीन जना र एक जना चितवन का रहेका छन्।

पक्राउ पर्नेहरूमा मानेभञ्ज्याङ–३, ओखलढुंगा घर भई हाल काठमाडौं–३१ बस्दै आएका ६१ वर्षीय ईमान सिंह राई, मानेभञ्ज्याङ–१ घर भई ललितपुर–२६ सुनाकोठी बस्ने ५९ वर्षीय कर्णबहादुर राई, मानेभञ्ज्याङ–३ घर भई भक्तपुर को निकोसेरा बस्ने ३९ वर्षीय अबिन कुमार राई रहेका छन्। त्यस्तै, भरतपुर–२५, चितवन घर भई काठमाडौं–६ बौद्ध बस्दै आएका ४२ वर्षीय लालबहादुर क्षेत्री पनि पक्राउ परेका छन्।

प्रहरीले जनाए अनुसार, उनीहरूले सहकारीमा सर्वसाधारणले बचत गरेको रकम फिर्ता नगरी ठगी गरेको उजुरीका आधारमा अनुसन्धान अघि बढाइएको हो। हाल उनीहरूमाथि जिल्ला अदालत ललितपुर बाट चार दिन म्याद थप गरी अनुसन्धान भइरहेको छ।प्रहरीले सहकारी ठगीसम्बन्धी थप प्रमाण संकलन गर्नुका साथै पीडितहरूको विवरण संकलन गर्ने कार्य जारी रहेको जनाएको छ।