एभरेष्ट दुधकोशी सांस्कृतिक पदमार्गमा पर्यटकको आकर्षण, एउटै सिजनमा दर्जनौ ग्रुपको भ्रमण

चैत्र २१, सोलुखुम्बु । तल्लो सोलुको एभरेष्ट दुधकोशी सांस्कृतिक पदमार्गमा पर्यटकको आकर्षण बढ्न थालेको छ । माप्यदुधकोसी गाउँपालिका स्थानीय सरकार र टानले संयुक्त रुपमा प्रबर्धन गरेको भर्जिन पदमार्ग पहिलो बर्षमै विदेशी पर्यटकको रोजाईमा परेको हो । अघिल्लो र यो सिजनमा मात्रै दर्जन बढी देशका समुहहरुले भ्रमण गरेको हुन् ।

अघिल्लो साल मात्रै गाउँपालिकाले निर्माण गरेको पदमार्गमा ट्रेकिङ एजेन्सि एशोसियसन अफ नेपाल (टान) ले प्रबर्धनात्मक भ्रमण शुरु गरेर चिनारी गराईएको पदमार्गमा अहिले अमेरिका, जर्मन, भारत लगायतका देशका दर्जन बढी समुहले भ्रमण र अवलोकन गरेका छन् । समुन्द्रि सतहबाट दुधकोसी नदीको काया स्थित ९ सय ४१ मिटर देखि आरान डाँडाको भ्यु प्वाईण्ट ३ हजार ३ सय १० मिटरको उचाईसम्म फैलिएको यो पदमार्ग सबै उमेर समुह र सिजनका लागि उपयुक्त रहेको पालिका अध्यक्ष बुद्धिकिरण राईले बताउनुभयो ।

सर्वोच्च शिखर सगरमाथा सहित दर्जन भन्दा बढी हिमशिखरहरुलाई नजिकैबाट अवलोकन गर्ने सकिने यो पदमार्ग प्रकृति र संस्कृतिको गज्जबको संयोजन रहेकाले विदेशीहरुको रोजाईमा परेको अल्पाईन ट्रेकिङ कम्पनीका संचालक अमृत राईको भनाई छ । सगरमाथा र त्यसको फेदसम्म पुग्न नसक्ने बृद्धबृद्धा पनि यो पदमार्गमा जाने गरेको छन् । अल्पाईन ट्रेकको जर्मनी टोलीमा २० जना मध्ये ३ जना पर्यटक ७० बर्ष माथि रहेको पर्यटन ब्यवशायी दुर्गा राईले बताउनुभयो । सिलगुडी डाँडा, रातानाङगे डाँडा, कुदाम डाँफे भिर, जोरढुंगा, जलेश्वरी मन्दिर, सोलाबन, धजे डाँडा र आरान डाँडा मुख्य दृश्य अवलोकन केन्द्र रहेको पालिकाका प्रबक्ता अमित राईले बताउनुभयो ।

पदमार्गले माप्यदुधकोशीका अलावा सोलुदुधकुण्ड नगरपालिका, खुम्बुपासाङल्हमु गाउँपालिका र थुलुङदुधकोशी गाउँपालिका लगायतलाई समेट्ने वडा नम्बर १ का अध्यक्ष सज्जन राईको भनाई छ । ६ दिनको पदयात्रामा प्रकृति र सांस्कृतिले आफुहरुलाई लोभ्याएको जर्मनी पर्यटक करिना बे ले बताईन । उक्त पदमार्गमा होम स्टेहरु संचालनमा रहेको र स्थानीयले पनि आर्थिक उपार्जन र रोजगारीको क्षेत्रमा प्रत्यक्ष लाभ लिएको पालिका अध्यक्ष बुद्धिकिरण राईले बताउनुभयो । उहाँका अनुसार योे पदमार्गमा थप पर्यटकीय सम्रचना निर्माणको योजना अगाडी बनाएको छ ।