नेचासल्यानमा एकै दिन २ वटा भवन उद्‌घाटन, प्रत्यक्ष सेवाको लागी दुबै कोशेढुंगा 

चैत्र २१, सोलुखुम्बु ।  नेचासल्यान गाउँपालिका सोलुखुम्बुले आज एकै दिन २ वटा भवन उद्‌घाटन गरेको छ ।  गाउँपालिकाको वडा नम्बर ५ मा निर्मित वडाको प्रशासनीक भवन र वडा नम्बर ३ मा निर्मित इलाका प्रहरी कार्यालयको भवन एकै दिन उद्‌घाटन गरि सञ्चालनमा ल्याइएको. हो ।  गाउँपालिका अध्यक्ष धनजन राईको प्रमुख आतिथ्यता एवं जिल्ला प्रहरी कार्यालय सोलुखुम्बुका प्रमुख डीएसपी मनोजित कुवँरको अध्यक्षतामा इलाका प्रहरी कार्यालय भवन उद्‌घाटन गरिएको थियो ।  

जीर्ण भवनबाट सुरक्षाको सेवा दिलाइरहेको इलाका प्रहरी कार्यालयका लागी गाउँपालिकाको ५० लाख रुपैयाँ बजेट मार्फत भवन निर्माण सम्पन्न गरिएको हो । भवन बनेपछि प्रहरीकाे सेवा प्रवाहमा थप सहजता हुँदै विश्वास लिइएको छ । प्रहरी आफै सुरक्षा दिने निकाय भएर पनि असुरक्षित भवनबाट सेवा दिन भएको कठिनइ महसुस गर्दै गत भदौ १० गते शिलान्यास गरिएको थियो ।  प्रहरी कार्यालयको भवन ९ महिनामै निर्माण सम्पन्न भएको हो । ऋद्धिसिद्धि निर्माण सेवाले निर्माणको जिम्मा लिएको भवनको काम नेचासल्यान गाउँपालिकाको ५५ लाख ७६ हजारमा सम्पन्न गरेको जनाइएको छ ।  

यता वडा नम्बर ५ को वडा कार्यालय भवन समेत शनिवार आजै उद्‌घाटन गरिएको छ ।  गाउँपालिकाबाट करिव ७ किलोमिटर टाढाको दुरीमा रहेका वडाको प्रशासनिक भवन गाउँपालिका अध्यक्ष धनजन राई, उपाध्यक्ष विना राई, प्रमुख प्रशासकीय अधिकृत टङ्कनाथ घिमिरे लगायतको उपस्थितिमा उद्‌घाटन गरिएको हो । जिल्ला समन्वय समितिको ६० प्रतिशत तथा गाउँपालिकाको ४० प्रतिशत लागत साझेदारीमा निर्मित भवनको लागत करिव ५० लाख रहेको छ ।  भवन निर्माण सम्पन्न भएपछि वडाबासीले सुविधा सम्पन्न भवनबाट सेवा प्राप्त गर्ने छन् ।