९ महिनामै बन्यो नेचामा इलाका प्रहरी भवन

चैत्र २१, सोलुखुम्बु । ९ महिनामै नेचासल्यान गाउँपालिकाको इलाका प्रहरी कार्यालयको भवन निर्माण सम्पन्न भएको छ ।  गत भदौमा शिलान्यास गरिएको इलाका प्रहरी कार्यालयको भवन ९ महिनामै निर्माण सम्पन्न भएर सञ्चालनमा आएको हो ।  गाउँपालिकाको वडा नम्बर ३ स्थित विहीबारेमा निर्मित प्रहरीको प्रशासनीक भवन गाउँपालिकाको ५५ लाख रुपैयाँ लागतमा निर्माण भएको हो ।

रिद्धिसिद्धि निर्माण कम्पनीले निर्माणको जिम्मा लिएको भवन ९ महिनामै निर्माण सम्पन्न भएपछि प्रहरीको सुरक्षा सेवामा एउटा इँटा थपिएको छ ।  वर्षौ पुरानो भवनबाट सेवा दिँदै आएको इलाका प्रहरी कार्यालय नेचालाई अव सुविधा सम्पन्न भवन प्राप्त भएको छ । भवन भित्रै शौचालय, कार्यालय प्रमुखको निवास, विभिन्न शाखाका लागी छुट्टै कोठा तथा कक्ष सहितको भवन बनेको छ ।  भवनले प्रहरी सेवालाई थप चुस्त बनाउने उद्‌घाटन कार्यक्रमका अध्यक्ष एवं डीएसपी मनोजित कुवँरको भनाई छ ।  

उद्‌घाटन कार्यक्रमका गाउँपालिकाका अध्यक्ष धनजन राईले आफूहरूको नेतृत्वमा गाउँपालिकामा भौतिक निर्माणको क्षेत्रमा निकै कामहरू भएको उल्लेख गर्दै प्रभावकारी सेवाको लागी आफू प्रतिवद्ध रहेको उल्लेख गर्नुभएको थियो ।  गाउँपालिकाले गाउँपालिकाको कार्यालय, प्रहरी भवन, सडक, वडा कार्यालय खानेपानी लगायतको क्षेत्रमा धेरै कामहरू गरिसकेको भन्दै ति कामहरूको संरक्षण गरे लामो समय सम्म समस्या नहुनेमा विश्वास व्यक्त गर्नुभयो ।

यस्तै गाउँपालिका उपाध्यक्ष विना राईले उद्‌घाटन कार्यक्रममा बोल्दै जीर्ण प्रहरीको भवनबाट प्रहरी अव सुरक्षित भवन तर्फ सरेकोमा खुसी व्यक्त गर्नुभयो ।  उहाँले आउने दिनमा प्रहरी सेवा आत्मविश्वासको साथ हुनेमा विश्वास व्यक्त गर्नुभएको थियो ।  

नव निर्मित प्रहरी भवन उद्‌घाटन कार्यक्रममा गाउँपालिकाको वडा नम्बर ३ का अध्यक्ष सिताराम भट्टराई, वडा नम्बर ४ का अध्यक्ष इन्द्र बहादुर राई, प्रमुख प्रशासकीय अधिकृत टङ्कनाथ घिमिरे, राजनैतिक दलका प्रमुख एवं स्थानीय अगुवा एवं नागरिकहरूको उपस्थिति रहेको थियो ।