खोटाङका १ हजार बढी सेवाग्राही निःशुल्क आँखा शिविरबाट लाभान्वित

चैत्र २२, सोलुखुम्बु । खोटाङको दिक्तेलमा सम्पन्न निःशुल्क आँखा शिविरबाट १ हजार १ सय ३९ जना सेवाग्राही लाभान्वित भएका छन् । नेपाल नेत्रज्योति संघ खोटाङको आयोजना तथा सगरमाथा आँखा अस्पताल लहानको प्राविधिक सहयोगमा शनिबार सम्पन्न तीनदिने शिविरमा ठूलो संख्यामा बिरामीले सेवा लिएका हुन् ।

संघका सभापति इन्द्र कसजूका अनुसार शिविरमा आएका बिरामीमध्ये १ सय ४९ जनाको आँखाको शल्यक्रिया गरिएको छ । त्यसैगरी ४ सय ८५ जना ज्येष्ठ नागरिकलाई निःशुल्क चस्मा वितरण गरिएको थियो । शिविरका क्रममा ७ सय ७० जनालाई आवश्यक औषधि उपलब्ध गराइएको थियो भने शल्यक्रिया गरिएका १ सय १५ जना बिरामीलाई कालो चस्मा पनि वितरण गरिएको जनाइएको छ ।

दूरदराजका नागरिकलाई सहज रूपमा आँखा उपचार सेवा उपलब्ध गराउने उद्देश्यले आयोजना गरिएको शिविरले स्थानीय बासिन्दामा सकारात्मक प्रभाव पारेको आयोजकले जनाएको छ ।