संखुवासभामा दुर्घटना: सेनाको सक्रियताले घाइतेको समयमै उद्धार

चैत्र ३०, साेलुखुम्बु ।     कोशी राजमार्ग अन्तर्गत खाँदबारी नगरपालिका–९ मा भएको ट्र्याक्टर दुर्घटनामा परी घाइते भएका ३ जनाको नेपाली सेनाले उद्धार गरेको छ।

दुर्घटनापछि इन्द्रदल गुल्मको सुरक्षा बेस तुम्लिङटारबाट खटिएको नेपाली सेनाको टोलीले अन्य सुरक्षा निकाय तथा स्थानीयवासीहरूको समन्वयमा घाइतेहरूको शीघ्र उद्धार गरेको हो। उद्धारपछि उनीहरूलाई थप उपचारका लागि मनकामना अस्पताल, तुम्लिङटार पुर्‍याइएको जनाइएको छ।

दुर्घटनाको खबर प्राप्त हुनासाथ तुरुन्तै परिचालन भएको नेपाली सेनाले दुर्गम तथा जोखिमपूर्ण अवस्थामासमेत प्रभावकारी ढंगले उद्धार कार्य सम्पन्न गरेको स्थानीयले बताएका छन्। विपद् तथा आकस्मिक अवस्थामा नेपाली सेनाले निरन्तर देखाउँदै आएको सक्रियता र प्रतिबद्धता यस घटनामा पनि प्रस्ट देखिएको छ।

स्थानीयवासीहरूले कठिन परिस्थितिमा समेत शीघ्र उद्धार गरी मानवीय सेवामा खटिएको नेपाली सेनाको भूमिकाको उच्च प्रशंसा गरेका छन्।