बैशाख १, सोलुखुम्बु । जिल्लाकै पहिलो तथा सरकारी लगानीमा बनेको जिपलाईनको औपचारिक उद्घाटन गरिएको छ । नेचासल्यान गाउँपालिका वडा नम्बर १ स्थित पर्यटकीय क्षेत्र गौरीटापमा निर्माण गरिएको जिपलाईन नयाँ वर्षको दिन मङ्गलबार नेचासल्यान गाउँपालिकाका अध्यक्ष धनजन राईले उद्घाटन गर्नुभएको हो । नेचासल्यान गाउँपालिकाको ८० लाख रुपैयाँको लगानीमा कालिका निर्माण सेवाले उक्त जिपलाईन निर्माण गरेको थियो ।
गत मङ्सिर १ गते शिलान्यास भएर ५ महिनामै निर्माण सम्पन्न गरि सञ्चालनमा ल्याइएको जिपलाईन जिल्लामै पहिलो सरकारी लगानीमा बनेको छ । पर्यटनको क्षेत्रमा गाउँपालिकालाई विश्वमाझ चिनाउँने उद्देश्यका साथ निर्मित जिपलाईन औपचारिक रुपमा नयाँ वर्ष २०८३ को पहिलो दिनबाट सञ्चालनमा आएको छ । जिपलाइन उद्घाटन गर्दै गाउँपालिका अध्यक्ष धनजन राईले साहसिक पर्यटनका अन्तर्गतको यस संरचनाले यस क्षेत्रको प्राकृतिक सुन्दरताको प्रवर्द्वन गर्दै गाउँपालिकालाई विश्वमाझ चिनाउने विश्वास लिएको बताउनुभयो । आधा किलोमिटर (५ सय मिटर ) लामो जिपलाईनमा नयाँ वर्षकै दिन सयाैँ स्वदेशी तथा विदेशी पर्यटकहरू झुमेका छन् ।
आधा दर्जन बढी प्रजातिका गुराँस फुल्ने गौरीटाप क्षेत्रबाट गुराँस सँगसँगै आधा दर्जनबढी हिमालको प्रत्यक्ष अवलोकन गर्न सकिने भएकाले पनि यसको निर्माणको औचित्यले पूर्णता पाएको प्रयोगकर्ताहरूले बताएका छन् । गाउँपालिकाले जिल्लामै गरेको नमुना प्रयासले तल्लो सोलु क्षेत्रको पर्यटनमा नयाँ आयाम थपेको थुलुङ दूधकोशी गाउँपालिका वडा नम्बर ७ का अध्यक्ष एवं गाउँ प्रवक्ता भोजराज कार्कीले बताउनुभयो ।
विगतमा सुनसान हुने गौरीटाप क्षेत्रमा जिपलाईन लगायतका पर्यटक आकर्षणको संरचनाहरू बनेपछि पत्ताले र गौरीटाप क्षेत्रको होटल तथा अन्य व्यवसयीक गतिविधिहरू सकेत उल्लेख्य बढेको स्थानीय प्रकाश मगर बताउनुहुन्छ । गौरीटाप क्षेत्रमा सबै उमेर समुहका पर्यटक तान्ने प्रयास गाउँपालिकाले गरेको छ । सोही उद्देश्यका साथ यहाँ हिल क्लाइम्बिङ संरचना, जिप साइक्लिङ, जिप लाईन, र झुलाको निर्माण गरिएको छ । यसले गर्दा वृद्धवृद्धा, बालबालीका तथा तन्नेरी उमेर समुहको उपस्थिति सुनिश्चित प्राय बनेको छ ।
Discussion about this post