प्रधानमन्त्री बालेनको टेवलमा सांसद रिना उप्रेती केसीका २५ बढी योजना 

बैशाख २, सोलु । सोलुखुम्बुकी प्रतिनिधिसभा सदस्य रिना उप्रेती केसीले प्रधानमन्त्रीलाई २५ वटा बढी विकास योजना माग गर्नुभएको छ ।  उहाँले जिल्लाभरका विभिन्न स्थानमा कार्यान्वयन गर्नका लागी जिल्लाका विभिन्न विकास आयोजनालाई आगामी आर्थिक वर्ष २०८३/८४ को बजेटमा समावेश गर्न सरकारसँग माग गर्नुभएको छ । प्रधानमन्त्री तथा मन्त्रिपरिषद् कार्यालयमार्फत उहाँले सडक, पुल, खानेपानी, पर्यटन, कृषि लगायतका योजनामा आवश्यक बजेट विनियोजन गर्न ध्यानाकर्षण गराउनुभएको हो ।

सांसद उप्रेतीले सल्लेरी–सोताङ–गुँदेल–भोजपुर, सल्लेरी–लुक्ला, जिरी–सल्लेरी सडक स्तरोन्नति तथा खारिखोला क्षेत्रका सडक निर्माण छिटो सम्पन्न गर्न माग गर्नुभएको छ। सिस्नेरी खण्डमा सुरुङ मार्ग निर्माण र सल्लेरी–सिङ्गुडीडाँडा सडकको रोकिएको काम पुनः सञ्चालन गर्न समेत जोड दिइएको छ ।

यस्तै, दूधकोशी, खारिखोला लगायतमा पुल निर्माण, रैदुङ खानेपानी आयोजना सम्पन्न गर्न बजेट व्यवस्था र ‘एक घर एक धारा’ कार्यक्रम प्रभावकारी बनाउन आग्रह गरिएको छ । पर्यटनतर्फ पत्ताले क्षेत्र, एभरेष्ट पदमार्ग र पिके क्षेत्रको पूर्वाधार विकासमा प्राथमिकता दिन माग गरिएको छ । कृषिमा वन्यजन्तुबाट हुने क्षति न्यूनीकरण, फलफूल तथा जडीबुटी उत्पादन प्रवर्द्धन र शीत भण्डारण निर्माणको आवश्यकता औंल्याइएको छ।

साथै वाप्सा तामाखानी उत्खनन, स्वास्थ्य संस्था र सामुदायिक भवन निर्माण सम्पन्न गर्न पनि बजेट माग गरिएको छ । स्थानीय तहलाई पर्वतारोहण रोयल्टीको ५० प्रतिशत उपलब्ध गराउने, जलविद्युत आयोजनामा स्थानीयको पहुँच सुनिश्चित गर्ने, जलवायु परिवर्तन न्यूनीकरण कार्यक्रम लागू गर्ने र किराँत कुलुङ तथा खालिङ जातिलाई सूचीकृत गर्न समेत सांसद उप्रेतीले सरकारसँग माग गर्नुभएको छ।