मेयर शेर्पाको पहलमा बुढानिलकण्ठ छात्रवृत्ति छनोट परीक्षा दोस्रो पटक हुँदै

बैशाख ४, सोलुखुम्बु । सोलुदुधकुण्ड नगरपालिकाका नगरप्रमुख नाम्गेलजाङबु शेर्पाले सोलुखुम्बुमा पर्याप्त सूचना नपुगेको भन्दै पुन सूचना गरी बुढानिलकण्ठ छात्रवृत्ति छनोट परीक्षा गर्न पहल गरेपछि दोस्रो पटक परीक्षा हुने भएको छ । बूढानीलकण्ठ स्कुल तथा साझेदारी कार्यक्रम अन्तर्गतका विद्यालयहरुमा शैक्षिक सत्र २०८३ का लागि कक्षा ५ मा निःशुल्क तथा सहुलियत शुल्कमा पढ्नका लागि छात्रवृत्ति छनोट परीक्षा यस अघि गएको २८ गते भएको थियो ।

सोलुखुम्बु जिल्लाका गरीब तथा जेहेन्दार विद्यार्थीहरुलाई दुर्गम क्षेत्रमा राम्रो सूचना नभई छनोट परीक्षा गर्दा गाउँमा रहेका क्षमतावान विद्यार्थीहरुको सहभागिता हुन नसकेको भन्दै नगर प्रमुख शेर्पाले गरेको आग्रहमा फेरि छनोट परीक्षा हुन लागेको हो । अर्काे परीक्षा बैशाख ५ गते जनजागृति मा.वि. सल्लेरीमा हुने भएको छ ।

गत चैत्र १ गतेको गोरखापत्र दैनिकमा प्रकाशित सूचना गरेको भए पनि राष्ट्रिय पत्रिकाको पहुँच बाहिर रहेको सोलुखुम्बुमा अधिकांश जिल्लावासीले पत्तो पाएका थिएनन् । पछिल्लो तालिकाअनुसार बैशाख ०४ गते दिउसो १ बजेदेखि वेलुका ४ बजेसम्म फाराम भर्ने समय तोकिएको भए पनि ५ गते विहान ८ बजे देखि १० बजेसम्म फारम बुझाउन सकिनेछ ।