अटो व्यवसायीबाट मनपरी भाडा असुली प्रति कम्पनीको ध्यानाकर्षण 

सोलुखुम्बु, वैशाख ३ । सोलुखुम्बु अटो प्रा.लि.ले आफ्नो मातहतमा सञ्चालित अटो टेम्पो व्यवसायीहरूले मनपरी रूपमा भाडा असुल गरेको भन्दै ध्यानाकर्षण भएको जनाएको छ ।  कम्पनीका अनुसार हाल इन्धन मूल्य वृद्धि, सवारी मर्मत खर्च तथा चालक पारिश्रमिक जस्ता आधारलाई ध्यानमा राख्दै सरकारले तोकेको मापदण्डअनुसार मात्रै भाडा समायोजन गरिएको छ ।

सोही आधारमा टेम्पो व्यवसायीहरूलाई भाडा असुल गर्न निर्देशन दिइएको भए पनि केही व्यवसायीले मनपरी रूपमा बढी भाडा उठाएको गुनासो प्राप्त भएको जनाइएको हो । साथै, जिल्लामा केही व्यवसायीहरूले कानुनी प्रावधान विपरीत अवैध रूपमा टेम्पो सञ्चालन गरी आफूखुसी भाडा असुल्ने गरेकोप्रति समेत कम्पनीले आपत्ति जनाएको छ । कम्पनीका अध्यक्ष मौज थुलुङले यस्ता गतिविधि नियन्त्रण गर्न सम्बन्धित निकायले कडा निगरानी बढाई कानुनी दायरामा ल्याउन आवश्यक पहल गर्नुपर्ने समेत माग गर्नुभएको छ ।

 अटो प्रा.लि.ले आफूले प्रचलित कानुनको पूर्ण पालना गर्दै सेवा सञ्चालन गरिरहेको स्पष्ट पार्दै यात्रुहरूलाई यात्रा गर्नुअघि भाडा सुनिश्चित गर्न र कुनै अनियमितता देखिएमा सवारी नम्बर सहित सम्बन्धित निकायमा जानकारी गराउन आग्रह गरेको छ। कम्पनीले आफ्नो मातहतका टेम्पोहरू कानुनअनुसार सञ्चालन भइरहेकाले कुनै पनि गैरकानुनी गतिविधिमा संलग्न नभएको पनि स्पष्ट पारेको छ।