सोलुखुम्बु बहुमुखी क्याम्पस भवन एक वर्ष भित्र ४ तला बनाउने प्रतिबद्धता

जेठ २८, सोलुखुम्बु । सोलुखुम्बु बहुमुखी क्याम्पसको ४ तल्ला भवन एक वर्षभित्र निर्माण गरिसक्ने क्याम्पसले प्रतिबद्धता जनाएको छ । आज एक तले भवन उद्घाटनका क्रममा क्याम्पस प्रमुख उद्धव कुमार शर्माले आर्थिक वर्ष २०८१÷८२ भित्र ४ तले भवन निर्माण गरिसक्ने प्रतिवद्धता व्यक्त गर्नुभएको हो । आज एक कार्यक्रमका वीच विश्वविद्यालय अनुदान आयोगको आर्थिक सहयोगमा निर्मित १ तले २ कोठे भवनको उद्घाटन गर्दै उहाँले उक्त एक तले भवनलाई आउने एक वर्ष भित्र ४ तले बनाउने प्रतिबद्धता व्यक्त गर्नुभएको छ ।

उहाँले विश्वविद्यालय अनुदान आयोगबाट फेरी तल्ला थप्नका लागी १ करोड बजेट परिसकेको भन्दै धन्यवाद दिनुभएको छ । उहाँले क्याम्पसको पर्फमेन्स हेरेर आयोगबाट बजेट विनियोजित हुने भन्दै क्याम्पसले शैक्षिक प्रगती भएको दावी गर्नुभयो । आयोगको ४५ लाख ३९ हजार ३ सय रुपैयाँको लागतमा एएसवि निर्माण सेवाले निर्माण गरेको भवन आज आयोगका अध्यक्ष देवराज अधिकारीले रिवन काटेर उद्घाटन गर्नुभएको हो । सोलुखुम्बु बहुमुखी क्याम्पसका क्याम्पस प्रमुख उद्धव कुमार शर्माको सभापतित्वमा सम्पन्न कार्यक्रममा प्रमुख अतिथी अधिकारीले सोलुखुम्बु बहुमुखी क्याम्पसले जिल्लामा शिक्षाको विकासमा महत्वपुर्ण योगदान गरेको बताउनुभएको छ ।

उहाँले विश्वविद्यालयले दिने अनुदानका लागी क्याम्पसले सम्पुर्ण मापदण्डहरु पुरा गरेकाले अनुदान पाउन सफल भएको बताउनुभएको छ । उहाँले विश्वविद्यालयले दिने अनुदान प्राप्त गर्न सफल भएकोमा क्याम्पसलाइृ धन्यवाद दिँदै आगामी अनुदान सहयोगमा पनि सहभागि हुन योग्य हुनुपर्ने बताउनुभएको छ । कार्यक्रममा बोल्दै कार्यक्रमका विशेष अतिथी तथा सोलुदूधकुण्ड नगरपालिकाका नगरप्रमुख नाम्गेल जाङबु शेर्पाले विद्यालयलाई नगरपालिकाले सहयोग गरिरहेको र सदैव गरिरहने बताउनुभयो । उहाँले विश्वविद्यालय अनुदान आयोगलाई धन्यवाद दिँदै सहयोग निरन्तर गर्न आग्रह गर्नुभएको छ ।

यस्तै कार्यक्रममा बोल्दै कार्यक्रमका विशेष अतिथी तथा विश्वविद्यालय अनुदान आयोगका निर्देशक राममणि गौतमले विश्वविद्यालय अनुदान आयोगबाट अनुदान प्राप्त गर्न धेरै प्रकृयाहरु रहेको भन्दै उक्त प्रकृयाहरू पुरा गर्न सोलुखुम्बु बहुमुखी क्याम्पस सफ भएको बताउनुभएको छ ।

कार्यक्रममा नेपाली काङ्ग्रेसका नेता तथा महाधिबेशन प्रतिनिधी एवं क्याम्पस सञ्चालक समितिका सदस्य प्रकाश सिंह कार्कीले क्याम्पसले उत्कृष्ठ क्याम्पस प्रमुख पाएको भन्दै शिक्षामा गरिएको लगानीले राम्रै प्रतिफल लिने बताउनुभएको छ । उहाँले देशभर नै राम्रो र गुणस्तर शिक्षा आवश्यक रहेको भन्दै विश्वविद्यालय अनुदान आयोगलाई धन्यवाद दिनुभएको छ । उहाँले सबैले शिक्षा क्षेत्रको विकासका लागी आ आफ्नो ठाउँबाट सहयोग गर्न आग्रह गर्नुभएको छ ।कार्यक्रममा क्याम्पस प्रमुख शर्मा, विश्वविद्यालय अनुदान आयोगका अध्यक्ष तथा अन्य पदाधिकारी, सोलुदुधकुण्ड नगरपालिकाका नगरप्रमुख तथा उपप्रमुख, सहायक प्रमुख जिल्ला अधिकारी सरोज अर्याल क्याम्पस सञ्चालक समितिका पदाधिकारी तथा सदस्य लगायत नेपाली सेना, नेपाल प्रहरी, संघ संस्थाका प्रतिनिधी, राजनितिक दलका प्रतिनिधी, विभिन्न विद्यालयका प्रधानाध्यापक तथा शिक्षक लगायतको उपस्थिति रहेको थियो ।