इन्धनको मूल्य घटाउन बुढीगण्डकीको पैसा चलाउन सरकारलाई सांसद कार्कीको सुझाव

बैशाख २२, सोलुखुम्बु । सांसद प्रकाश सिंह कार्कीले इन्धनको मूल्यवृद्धिका कारण आम नागरिक समस्यामा परेको भन्दै सरकारले तत्काल मूल्य समायोजन गर्नुपर्ने माग गर्नुभएकाे छ । मंगलबार बसेको उद्योग तथा वाणिज्य र श्रम तथा उपभोक्ता हित समितिको बैठकमा बोल्दै उनले इन्धनको मूल्य बढ्दा ढुवानी मात्र नभई दैनिक उपभोग्य वस्तुको मूल्यमा समेत प्रत्यक्ष असर परेको बताउनुभएकाे हाे ।

सांसद कार्कीले बुढीगण्डकी जलविद्युत आयोजनाका नाममा जनताबाट उठाइएको रकम प्रयोग गरेर भए पनि अहिलेको मूल्यवृद्धि नियन्त्रण गर्न सुझाव दिनुभयाे। कम्पनी ऐन संशोधनको सन्दर्भमा बोल्दै उहाले विद्यमान कानुनमा धेरै जरिवाना र दण्डको व्यवस्था गरिएकोमा असन्तुष्टि जनाउनुभयाे ।

दण्ड र जरिवानाले मात्र देश नचल्ने भन्दै उहाँले व्यावसायिक वातावरण बनाउन सरकारलाई आग्रह गर्नुभयाे । सरकारले ल्याएको अनिवार्य अधिकतम खुद्रा मूल्य (एमआरपी) सम्बन्धी व्यवस्थाका कारण वैदेशिक व्यापारमा ठुलो समस्या देखिएको कार्कीले बताए । १५ दिनको मात्र सूचना दिएर एमआरपी अनिवार्य गर्दा युरोप र अमेरिकाबाट आउँदै गरेका सामानहरू बीचैमा रोकिएको भन्दै उहाँले हाल नेपालका विभिन्न नाकामा ५ हजार र कोलकाता तथा भाइजाग बन्दरगाहमा १५ सय कन्टेनर एमआरपी लेबल नभएकै कारण रोकिएको बताउनुभयाे ।

आयात–निर्यातमा भारतीय सिपिङ कम्पनी र नेपाली फ्रेट फरवार्डरबीच विभेद रहेको भन्दै ससांद कार्कीले सरकारको ध्यानाकर्षण गराउनुभएकाे थियाे । उहाँले टीटी मार्फत सामान ल्याउँदा नेपाली व्यवसायीले एनओसी लिनुपर्ने बाध्यता हटाउन, विराटनगर जुट मिल जस्ता सरकारी उद्योगहरू बन्द हुँदा पनि कर्मचारी पालेर राज्यलाई भार परिरहेको भन्दै  उद्योगहरू चलाउन वा उचित निर्णय लिन सरकारसंग माग गर्नुभयाे ।

उद्योगहरू चल्दा स्वदेशमै रोजगारी सिर्जना हुने र युवाहरू विदेश पलायन हुने क्रम रोकिने उहाँको तर्क थियो । सांसद कार्कीले काठमाडौँमा मात्र सीमित रहेको व्यापार तथा निकासी प्रवद्र्धन केन्द्र लाई प्रदेश स्तरमा विस्तार गर्न र सोलुखुम्बुमा पनि यसको कार्यालय स्थापना गर्न माग गर्नुभयाे ।