सोलुखुम्बुमा अन्धोपन निवारण सम्बन्धी पुनर्ताजगी तालिम सम्पन्न

बैशाख २२, सोलुखुम्बु । सोलुखुम्बुको सोलुदुधकुण्ड नगरपालिका वडा नम्बर ११ का महिला सामुदायिक स्वास्थ्य स्वयंसेविका तथा स्वास्थ्यकर्मीहरूका लागि अन्धोपन निवारण सम्बन्धी पुनर्ताजगी तालिम सम्पन्न भएको छ । क्योर ब्लाइन्डनेस प्रोजेक्टको सहयोग तथा जिल्ला आँखा अस्पताल फाप्लुको आयोजनामा सञ्चालन गरिएको उक्त तालिम दुई दिनसम्म चलेको थियो ।

तालिममा पहिलो दिन ३७ जना स्वास्थ्य स्वयंसेविका र ५ जना स्वास्थ्यकर्मी सहभागी भएका थिए भने दोस्रो दिन ३४ जना स्वयंसेविका र ६ जना स्वास्थ्यकर्मीको सहभागिता रहेको थियो ।

जिल्ला आँखा अस्पताल फाप्लुका प्रमुख विधान ताम्राकारका अनुसार समुदायस्तरमा आँखासम्बन्धी समस्याको पहिचान, समयमै उपचारमा पहुँच वृद्धि तथा अन्धोपन न्यूनीकरण गर्ने उद्देश्यले तालिम सञ्चालन गरिएको हो। तालिममार्फत स्वास्थ्य स्वयंसेविका तथा स्वास्थ्यकर्मीहरूको ज्ञान र सीपमा अभिवृद्धि भई ग्रामीण क्षेत्रमा आँखाको स्वास्थ्य सेवा अझ प्रभावकारी जनाइएको छ । तालिमको सहजिकरण हस्तबहादुर राईले गर्नुभएको थियो ।