सोलुदुधकुण्ड–३ मा ६ कृषक समूहलाई १० लाख बराबरका कृषि औजार वितरण

बैशाख २२, सोलुखुम्बु । सोलुखुम्बुको सोलुदुधकुण्ड नगरपालिका वडा नम्बर ३ मा कृषकहरूलाई करिब १० लाख रुपैयाँ बराबरका कृषि औजार वितरण गरिएको छ । मंगलबार नगरपालिकाको कृषि यान्त्रीकरण प्रवद्र्धन कार्यक्रम अन्तर्गत ६ वटा कृषक समूहलाई विभिन्न आधुनिक कृषि सामग्री हस्तान्तरण गरिएको हो ।

कृषि शाखा प्रमुख डोल्मादिकी शेर्पाका अनुसार वितरण गरिएका सामग्रीहरूमा १० वटा मिनिटिलर, ४ वटा थ्रेसर, ५ वटा कम्बाइन मिल, १२ वटा घाँस काट्ने मेसिन तथा २ वटा कर्न सेलर रहेका छन् । वितरण कार्यक्रममा बोल्दै नगरपालिकाका मेयर नाम्गेल जाङ्बु शेर्पाले कृषि औजारहरूको सामूहिक प्रयोग गर्न कृषक समूहहरूलाई आग्रह गर्नुभयो ।

उहाँले आधुनिक उपकरणको प्रयोगले श्रम र समय दुवैको बचत हुनुका साथै उत्पादनमा वृद्धि हुने विश्वास व्यक्त गर्नुभयो । त्यसैगरी वडा अध्यक्ष लाक्पा गेलु शेर्पाले प्राप्त कृषि औजारहरूको सही सदुपयोग गर्न कृषकहरूलाई आग्रह गर्नुभयो। कृषि सामग्री प्राप्त गरेपछि कृषकहरूले उपकरणहरूको उचित प्रयोग गर्दै उत्पादन वृद्धि गर्ने प्रतिबद्धता व्यक्त गरेका छन् ।