सोलुदुधकुण्ड भित्रका सरकारी कार्यालय आइतबार पनि खुल्ने

बैशाख २२, सोलुखुम्बु । सोलुखुम्बुको सोलुदुधकुण्ड नगरपालिकाले सार्वजनिक बिदाका दिनसमेत सेवा प्रवाहलाई निरन्तरता दिने निर्णय गरेको छ । नगर प्रमुख नाम्गेल जाङबु शेर्पाको अध्यक्षतामा मङ्गलबार बसेको कार्यपालिका बैठकले यस्तो निर्णय गरेको हो ।  सरकारले हप्तामा २ दिन शनिबार र आइतबार विदा दिने गरेकाे निर्णयलाई अव्यवहारिक भन्दै नगरपालिकाले बैशाख २७ गतेबाट यो निर्णय लागू गर्ने भएको छ ।

 नगरपालिकाद्वारा जारी प्रेस विज्ञप्ति अनुसार सार्वजनिक बिदाका कारण सेवा प्रवाहमा हुने अवरोध न्यूनीकरण गरी नागरिकलाई सहज, छरितो र प्रभावकारी सेवा उपलब्ध गराउने उद्देश्यले यस्तो व्यवस्था गरिएको हो । निर्णयअनुसार नगरपालिकाको कार्यालय, वडा कार्यालय सहित नगर अन्तर्गतका सबै प्रशासनिक कार्यालयहरू आइतबारसमेत नियमित रूपमा खुल्ने छन् ।

साथै, नगरक्षेत्रभित्र रहेका सामुदायिक विद्यालयहरूमा पनि आइतबार पठनपाठन नियमित रूपमा सञ्चालन हुने व्यवस्था मिलाइएको छ । यस्तै, स्वास्थ्य सेवामा कुनै अवरोध नआउने सुनिश्चित गर्न नगरपालिका अन्तर्गतका अस्पताल, स्वास्थ्य चौकी तथा आधारभूत स्वास्थ्य सेवा केन्द्रहरूमा आकस्मिक तथा अत्यावश्यक सेवा आइतबारसमेत नियमित रूपमा सञ्चालन गरिने जनाइएको छ। नगरपालिकाले कार्यालय समय तथा विद्यालय समय भने साविककै व्यवस्था अनुसार कायम हुने नगरपालिकाका प्रवक्ता फुर्वा ग्याल्जेन शेर्पाले बताउनुभयो ।