जिल्ला सामुदायिक आँखा केन्द्र फाप्लुको सामाजिक परीक्षण सम्पन्न 

बैशाख २९, सोलुखुम्बु । जिल्ला सामुदायिक आँखा केन्द्र फाप्लुले वार्षिक सामाजिक परिक्षण सम्पन्न गरेको छ ।  आँखा स्वास्थ्यको क्षेत्रमा सोलुखुम्बुमा काम गर्दै आएको संस्थाले मङ्गलबार सामाजिक परिक्षण सम्पन्न गरेको हो  । केन्द्रले यस वर्ष जिल्लामा गरिएका आँखा स्वास्थ्यका कामहरूका साथै स्थापना देखी हाल सम्म भएका गतिविधि र कामहरूको बारेमा समेत जानकारी गराएको हो ।  केन्द्रका प्रमुख विधान ताम्राकारले जिल्ला सामुदायिक आँखा केन्द्रले हाल सम्म जिल्ला स्थति कार्यालयबाट झण्डै ८५ हजारको आँखा जाँच गरिसकेको जानकारी दिनुभएको थियो ।

 प्रस्तुतिका क्रममा उहाँले विभिन्न पालिकाहरूमा गएर समेत आँखा जाँच तथा शल्यक्रियाका काम गरिएको बताउँदै बाहिरी कार्यक्रमहरूबाट ५३ हजार ८ सय जना नागरिकको आँखा चेकजाँच गरिएको जानकारी दिनुभएको थियो ।  केन्द्रले विद्यार्थीहरूलाई समेत लक्षित गरेर विद्यालयहरूमा गरिएको स्कृनिङ कार्यक्रमबाट करिव २४ हजार विद्यार्थी लाभान्वित भएको उल्लेख गर्नुभयो ।  यो प्रगति सामुदायिक आँखा केन्द्र फाप्लुको स्थापना भएको सन् १९९७ देखी २०२५ सम्मको हो ।  

यस्तै यस अवधीमा कार्यालयले आँखा सेवाबाट ४२ करोड बढी आम्दानी गरिसकेको छ ।  उक्त रकम कार्यालय सञ्चालन देख कर्मचारी तलब लगायतमा खर्च भएको उहाँको भनाई थियो ।  हाल सम्म कार्यालयले २४ सय २६ जनाको आँखा शल्यक्रिया गरि नयाँ ज्योति दिलाउन सफल भएको कार्यालय प्रमुख ताम्राकारले बताउनुभयो ।  

सामाजिक परीक्षणमा सोलुदुधकुण्ड नगरपालिकाका उपप्रमुख गान्धीमाया तामाङ सहित समाजकल्याण परिषदका प्रतिनिधि, स्थानीय राजनीतिक दलका प्रतिनिधि लगायतको उपस्थिति रहेको थियो ।  आँखा केन्द्रले तिलगङ्गा आखा अस्पतालको सहयोगमा जिल्लामा सहुलियत रुपमा आँखा उपचार तथा परामर्श सेवा दिइरहेको जनाइएको छ ।