चुलु फार ईष्टमा सशस्त्र प्रहरीको झण्डा फहरियो, ६०३८ मिटर उचाइमा सफल आरोहण

वैशाख ३०, साेलुखुम्बु ।    सशस्त्र प्रहरी बल नेपालको टोलीले मनाङस्थित चुलु फार ईष्ट हिमाल सफलतापूर्वक आरोहण गर्दै अर्को साहसिक उपलब्धि हासिल गरेको छ।

सशस्त्र प्रहरी बल नेपाल पर्वतीय उद्धार तालिम शिक्षालय, मनाङमा सञ्चालित “उच्च भूभाग खोज तथा उद्धार तालिम” अन्तर्गत खटिएको टोलीले बुधबार बिहान ६ः४५ बजे ६,०३८ मिटर अग्लो चुलु फार ईष्ट हिमालको सफल आरोहण गरेको हो।

सशस्त्र प्रहरी बलका नायब महानिरीक्षक तथा प्रवक्ता विष्णु प्रसाद भट्टका अनुसार सशस्त्र प्रहरी नायब उपरीक्षक बाबुराम थापाको कमाण्डमा रहेको टोलीले कठिन हिमाली चुनौती पार गर्दै सफलतापूर्वक चुचुरोमा पुग्न सफल भएको हो।

🏔️ टोलीमा रहेका सदस्यहरू:
▪️ ४ जना प्रशिक्षक
▪️ १८ जना प्रशिक्षार्थी
▪️ २ जना शेर्पा गाइड

उक्त टोली वैशाख २७ गते मनाङ जिल्लाको ङिस्याङ गाउँपालिका–३ स्थित चुलु क्षेत्रबाट आरोहण अभियानका लागि प्रस्थान गरेको थियो। वैशाख २८ गते राति ११ बजेदेखि सुरु गरिएको आरोहण अन्ततः बुधबार बिहान सफलतामा परिणत भएको हो।

कठिन हिमाली भूगोल, चिसो मौसम र जोखिमपूर्ण यात्राका बीच सशस्त्र प्रहरी टोलीले देखाएको साहस, अनुशासन र क्षमता अहिले प्रशंसाको विषय बनेको छ।

 हिमालसँग जुध्दै देशको सुरक्षा मात्रै होइन, साहस र समर्पणको उदाहरण पनि प्रस्तुत गरिरहेको छ सशस्त्र प्रहरी बल नेपाल।