जारी रेडियो विकास तालीमको तेश्रो दिनको कार्यशाला सम्पन्न

जेठ ७, सोलुखुम्बु । कोशी प्रदेशका निजी तथा सामुदायिक रेडियोहरूको क्षमता अभिवृद्धि गर्ने उद्देश्यले सञ्चालन गरिएको चार दिने रेडियो विकास तालिमको तेस्रो दिन बुधबार विभिन्न विषयमा प्रशिक्षण सहित सम्पन्न भएको छ । आन्तरिक मामिला तथा कानुन मन्त्रालयको आयोजना तथा सामुदायिक रेडियो प्रसारक सङ्घ (अकोराव) कोशी प्रदेशको सहकार्यमा सञ्चालित तालिममा प्रदेशका १० जिल्लाका ४० वटा रेडियोका सञ्चालक तथा प्रतिनिधिहरू सहभागी छन् ।

तेस्रो दिनको प्रशिक्षणमा चेतन धमला, तुला अधिकारी, ज्ञानेन्द्र निरौला र महेन्द्र काफ्लेले रेडियोको वर्तमान अवस्था, डिजिटल युगमा रेडियोको भूमिका, सामग्री उत्पादन, सञ्चारको विश्वसनीयता तथा रेडियोको प्रभावकारिताबारे सहजीकरण गर्नुभएको थियो । प्रशिक्षकहरूले बदलिँदो सञ्चार प्रविधिसँगै रेडियोलाई समयानुकूल रूपान्तरण गर्दै स्थानीय समुदायसँग अझ प्रभावकारी रूपमा जोडिनुपर्नेमा जोड दिनुभएको थियो ।

तालिममा सोलुखुम्बु, ओखलढुङ्गा, पाँचथर, ताप्लेजुङ, धनकुटा, संखुवासभा, उदयपुर, मोरङ र सुनसरी लगायत जिल्लाका रेडियो सञ्चालकहरूको सहभागिता रहेको छ । रेडियोको महत्व, वर्तमान समयमा यसको उपयोगिता तथा सञ्चार क्षेत्रमा देखिएका चुनौती र अवसरबारे केन्द्रित तालिम शुक्रबारसम्म सञ्चालन हुने आयोजकले जनाएको छ ।

याे समाचार अावाजमा सुन्नुहाेस