हुँगा खोलामा अज्ञात पुरुषको शव फेला, पहिचानका लागि सोलु प्रहरीको आग्रह

सोलुखुम्बु, जेठ ७ । सोलुखुम्बुको सोताङ गाउँपालिका–१ स्थित हुँगा खोलामा एक अज्ञात पुरुषको शव फेला परेको छ। बुधबार दिउँसो १२ः५० बजेको समयमा प्रहरी चौकी पावैबाट प्रहरी सहायक हबल्दारको कमाण्डमा खटिएको गस्ती टोलीले नियमित गस्ती गर्ने क्रममा खोलामा ढुङ्गाको च्यापमा अड्किएको अवस्थामा शव फेला पारेको हो।

प्रहरीका अनुसार शवको एउटा खुट्टा र एउटा हात मात्र बाहिर देखिएको अवस्थामा भेटिएको थियो। घटनाबारे जानकारी प्राप्त भएपछि इलाका प्रहरी कार्यालय सोताङबाट प्रहरी निरीक्षकको कमाण्डमा थप टोली खटिई कानुनी प्रक्रिया पूरा गरी शवलाई जिल्ला अस्पताल फाप्लु ल्याउने कार्य भइरहेको जनाएको छ।

हालसम्म मृतकको पहिचान खुल्न नसकेको जिल्ला प्रहरी कार्यालय सोलुखुम्बुले जनाएको छ। प्रहरीका अनुसार शवको पहिचान भएमा वा सम्बन्धित व्यक्तिबारे जानकारी भएमा जिल्ला प्रहरी कार्यालय सोलुखुम्बुको सम्पर्क नम्बर ९८५२८९०१९९ मा खबर गरिदिन अनुरोध गरिएको छ।