बाल सहभागितालाई प्राथमिकता दिँदै ताप्लीमा बालक्लव क्षमता अभिवृद्धि कार्यक्रम सुरु

जेठ ८, सोलुखुम्बु । उदयपुरको ताप्ली गाउँपालिका–५ रुपाटारमा वडास्तरीय बालक्लव क्षमता अभिवृद्धि कार्यक्रम शुक्रबारदेखि सुरु भएको छ। “बालअधिकार, नेतृत्व र सहभागिता सुदृढीकरण” भन्ने मूल नारासहित सञ्चालन गरिएको कार्यक्रममा बालबालिकाको नेतृत्व विकास, अधिकार संरक्षण तथा सहभागिता अभिवृद्धिमा जोड दिइएको छ।

कार्यक्रमअन्तर्गत ताप्ली गाउँपालिकाको वडा नं. १ ओख्ले, वडा नं. ४ ठानागाउँ र वडा नं. ५ रुपाटारका विद्यालयस्तरीय तथा समुदायस्तरीय बालक्लवका पदाधिकारीहरू सहभागी भएका छन्। कार्यक्रममा बालअधिकार, बाल संरक्षण, नेतृत्व विकास तथा बालबालिकाको सर्वाङ्गीण विकासका लागि नेपाल सरकार, स्थानीय सरकार र साझेदार संस्थाहरूले निर्वाह गरिरहेका भूमिकाबारे छलफल तथा अन्तरक्रियात्मक सत्र सञ्चालन गरिएको छ।

साथै, आगामी बजेट निर्माण प्रक्रियामा बाल सहभागितालाई उच्च प्राथमिकतामा राख्दै बजेट, नीति तथा कार्यक्रम निर्माण गर्नुपर्ने विषयमा समेत कार्यक्रममा विशेष जोड दिइएको आयोजकले जनाएको छ। तीनवटा वडाबाट ३५ जना बालबालिकाको सहभागिता रहेको उक्त कार्यक्रमको सहजीकरण जालपा एकीकृत विकास समाजका फिल्ड सुपरभाइजर सरोज हमाल र शंकर रिखाम मगरले गरिरहेका छन्।

कार्यक्रमको आयोजना ताप्ली गाउँपालिकाको महिला तथा बालबालिका शाखाले गरेको हो। महिला विकास निरीक्षक मनिता कुमारी महतोका अनुसार बालबालिकाको क्षमता विकास र स्थानीय तहको नीति निर्माण प्रक्रियामा उनीहरूको सहभागिता सुनिश्चित गर्ने उद्देश्यले कार्यक्रम सञ्चालन गरिएको हो।